Almaty ákimdigi Parlamentke turǵyn úı zańnamasyna ózgeris engizýdi usynbaq
ALMATY. QazAqparat - Almaty ákimdiginde qala basshylyǵy men Májilis depýtattary Páter ıeleri kooperatıvi (PIK) qyzmeti týraly zańnamaǵa engizilýi yqtımal ózgeristerdi talqylady, dep habarlaıdy «QazAqparat» HAA tilshisi.
Mamandar málimdegendeı, «QR Turǵyn úı qatynastary týraly» zańynyń PIK-terge qatysty taraýyna 1997 jyldan beri esh ózgeris engizilmegen.
Turǵyn úı ınspektsııasy basqarmasynyń basshysy Ánýar Óskenbaevtyń aıtýynsha, PIK-terdiń turǵyndar aldyndaǵy jaýapkershiligin arttyrý maqsatynda sarapshy top 29 ózgertý usynbaq.
«Ákimshilik shyǵyndar kópshilikke belgisiz. Keıbir PIK-terdiń shyǵyny 80 paıyzǵa jetip otyr. Sonda tek 20 paıyz ǵana úıdi jóndeý maqsatyna jumsalady. «Turǵyn úı qatynastary týraly zańyna» PIK-terdiń esepshotyndaǵy somany qadaǵalaýǵa ruqsat beretin múmkindik kerek. PIK basshysyn ózgertý úshin sot shyǵyndaryn da ortaq qarjydan shyǵarýdy doǵarý qajet», - dedi ol.
Sondaı-aq, PIK-terge jınaqtalǵan somany turǵyndardyń ruqsatymen ǵana jumsaý usynyldy.
PIK tóraǵalarynyń qyzmet ótilin 3 jylǵa deıin qysqartý kózdelgen.
«Álbette PIK pen turǵyndardyń ǵana emes, olardyń memlekettik organdarmen qatynasyn retteý qajettiligi týyp otyr. Bul usynystardy qaperge alamyz», - dedi QR Parlament Májilisiniń depýtaty Gúlmıra Isımbaeva.
Almaty ákimdiginiń habarlaýynsha, qalada qazir 8,5 myń kóppáterli úı bar. Olarda 800 PIK jumys istep keledi.
