Almaty ákimdigi ornalasqan ǵımarat qalalyq máslıhatqa beriledi

ALMATY. QazAqparat – Almaty qalasynyń ákimdigi ornalasqan qazirgi ǵımarat keler jyly qalalyq máslıhatqa beriledi. Bul týraly qalalyq máslıhattyń kezekten tys sessııasynda Almaty ákimi Erbolat Dosaev málimdedi, dep habarlaıdy QazAqparat tilshisi.

Erbolat Dosaevtyń aıtýynsha, Almaty ákimdigi ornalasqan qazirgi ǵımaratqa kúrdeli jóndeý jumystary júrgizilmek.

«Keler jyly Abylaı han men Áıteke bı kósheleriniń qıylysynda Almaty qalasynyń ákimdigi ýaqytsha ornalasqan ǵımaratqa kúrdeli jóndeý júrgizilýi kózdelip otyr. Osyǵan oraı, kóktemde rekonstrýktsııadan soń, turaqty túrde ornalasý úshin nysandy Almaty qalasynyń máslıhatyna berý týraly sheshim qabyldadym», - dedi Erbolat Dosaev.

Eske salaıyq, buǵan deıin Erbolat Dosaev Almaty ákimdigi ǵımaratyn qalpyna keltirý jumystary 2023 jyly «Naýryz» merekesine deıin aıaqtalýy tıis ekenin aıtqan bolatyn.