Almaty ákimdigi oqýshylardy tasymaldaıtyn 100 avtobýs satyp alady

Úkimettiń resmı saıtynyń málimetinshe, Premer jolaýshylar, júk jáne mamandandyrylǵan tehnıka shyǵaratyn «Hyundai Trans Auto» JShS zaýytyna bardy. Kásiporyn 2011 jyly «Hyundai Motor Company» kompanııasymen (Ońtústik Koreıa) yntymaqtastyq týraly memorandým aıasynda iske qosyldy.

Búgingi tańda zaýyt respýblıkanyń jeke menshik kompanııalaryna, kommýnaldyq uıymdaryna jáne memlekettik organdaryna Hyundai, Golden Dragon jáne Foton kólik quraldarynyń keń jelisin (reanımobılder, órt sóndirý mashınalary, qoqys tasıtyn kólikter, sý tasıtyn kólikter, evakýatorlar, júk kólikteri) jetkizedi. Aldaǵy birneshe jylda kásiporyn basshylyǵy óndiristi keńeıtýdi, jańa jumys oryndaryn ashyp, eksportty ulǵaıtýdy jáne lokalızatsııalaý úlesin arttyrýdy josparlap otyr.

Sonymen qatar «Astana Grýpp» holdınginiń prezıdenti Nurlan Smaǵulov Premer-Mınıstrdiń nazaryn birqatar problemalyq máselege aýdardy. Atap aıtqanda, ónim eksporty, Qytaıdan Qazaqstanǵa júk tasymaldaý jáne óndirýshilerge kádege jaratý alymy boıynsha bereshekti tóleý máseleleri qozǵaldy.

Álıhan Smaıylov Úkimet el ekonomıkasyn odan ári ártaraptandyrýdy qoldaıtynyn jáne bul zaýyt osy jumystyń bir mysaly ekenin atap ótti.

«12 jyl ishinde kásiporyn naryqtaǵy óz pozıtsııasyn edáýir nyǵaıtty. Biz kompanııanyń ónim jelisine ınvestıtsııa salý jáne ony keńeıtý josparlaryn quptaımyz. Memleket basshysy qala ákimdiginiń aldyna halyqtyń júrip-turýyna yńǵaıly kólikpen qamtamasyz etip, ekologııaǵa tıgizetin zardaptardy azaıtý mindetin qoıdy. Sondyqtan bul óndiris tek qala úshin ǵana emes, búkil respýblıka úshin de zor mańyzǵa ıe», — dedi Premer-Mınıstr. Sondaı-aq Úkimet basshysy kóterilgen máselelerdiń sheshimin tabýǵa járdemdesetinin aıtty.

Qazirgi ýaqytta Oqý-aǵartý jáne Densaýlyq saqtaý mınıstrlikteriniń tapsyrysy boıynsha «Hyundai Trans Auto» JShS zaýytynda Golden Dragon markasynyń mektep avtobýstary jáne Hyundai (H-1, H350) shaǵyn avtobýsy bazasynda jedel járdem kólikteri qurastyrylyp jatyr. Atap aıtqanda, «Mektep avtobýsy» pılottyq jobasy aıasynda Almaty ákimdigi mektepke oqýshylardy tasymaldaý úshin 100 jańa tehnıka satyp alýdy josparlap otyr. Barlyǵy 29 mektepte bilim alatyn 7,7 myń oqýshyǵa jaǵdaı jasaý kózdelgen.

Premer-Mınıstr bilim berý sapasyn arttyrýdyń basty faktorlarynyń biri árbir oqýshynyń qajettilikterine baǵdarlanǵan jáne onyń qaýipsizdigin qamtamasyz etetin jaıly mektep ortasy ekenin atap ótti. Sondyqtan «Mektep avtobýsy» pılottyq jobasy – osyndaı iri megapolıstegi máseleniń durys jáne ýaqytyly sheshimi.

Budan ári Úkimet basshysy «Valtherm» JShS joǵary qysymmen quıý ádisin qoldanatyn Qazaqstandaǵy alǵashqy alıýmınıı jáne bımetall jylý radıatorlaryn shyǵaratyn zaýyt qurylysynyń barysymen tanysty. Jobaǵa salynǵan jalpy ınvestıtsııalar – shamamen 15 mlrd teńge.

Álıhan Smaıylov qala ákimdigi qaıta óńdeý deńgeıi joǵary osyndaı ımportty almastyratyn óndiristerdi damytýǵa erekshe nazar aýdarýy qajet ekenin atap ótti. Atap aıtqanda, atalǵan zaýytty iske qosý Qazaqstannyń basqa elderden radıatorlar jetkizýge táýeldiligin tómendetýge eleýli úles qosady.

Zaýyt ónimi beriktigi men jylý berý boıynsha Qytaıda shyǵarylyp, Qazaqstanǵa ákelinetin balamaly radıatorlardan 40-50%-ǵa asyp túsedi dep kútilýde. Kompanııa 430 jańa jumys ornyn ashýdy, otandyq qurylys kompanııalarynyń suranysyn ishinara qamtamasyz etýdi jáne kórshi elderge tasymaldaýdy jolǵa qoıýdy josparlap otyr. Birinshi kezeńde kásiporynnyń óndiristik qýaty jylyna 7,2 mln radıator bolsa, al tolyq qýatyna shyqqannan keıin kórsetkish 15 mln-nan aspaq. Bıylǵy shildede quıma óndirisin iske qosý kózdelgen.

Bul rette Úkimet basshysy osy baǵytty qoldaý úshin elden alıýmınıı synyqtaryn baqylaýsyz shyǵarýdyń jolyn kesý jáne sýmen jylytý quraldaryna mindetti sertıfıkattaýdy engizý jónindegi sharalar pysyqtalatynyn aıtty.

Sonymen qatar Premer-Mınıstr shaǵyn ónerkásip parkteri men qalanyń ındýstrııalyq aımaǵy rezıdentterimen kezdesti.