Almaty ákimdigi nan men birinshi sortty unnyń baǵasyn turaqtandyrý jónindegi memorandýmnyń oryndalýyn baqylaıtyn bolady
ALMATY. 3 tamyz. QazAqparat - Almaty qalasynyń ákimdigi qalypty nan men birinshi sortty unnyń baǵasyn turaqtandyrý jónindegi memorandýmnyń oryndalýyn baqylaıtyn bolady, dep habarlady qala ákiminiń baspasóz qyzmeti.
2012 jyldyń 26 shildesinde qalypty nan men birinshi sortty unnyń baǵasyn turaqtandyrý jónindegi sharalar týraly memorandýmǵa Almaty qalasynyń ákimdigi, Aýyl sharýashylyq mınıstrligi, «KazAgro» holdıngi men Qazaqstannyń astyq óńdeýshiler Odaǵy qol qoıǵan bolatyn.
Almaty qalasy Kásipkerlik jáne ónerkásip basqarmasynyń bastyǵy Alfııa Balova brıfıngte aıtqandaı, «Holdıng «KazAgro» AQ-nyń úzeńgiles kompanııasy bolyp tabylatyn «Azyq-túlik kelisim-shart korporatsııasy» UK» AQ-ynan Almaty qalasyna ár tonnasynyń baǵasy 28 myń teńge bolatyn 113 100 tonna astyq jiberiledi. Astyq 1-sortty un shyǵarý úshin qalanyń iri astyq óńdeýshi kásiporyndaryna bólinetin bolady. Naýbaıhanalar bul unnan áleýmettik nandardy shyǵarady.
Naýbaıhanalar qalypty (áleýmettik) nandardyń bir bólkesine 56 teńge bolatyn kóterme baǵa qoıatyn bolady, al bir bólke nannyń salmaǵy - 650 gramm. Bólshek saýdada mundaı nannyń baǵasy 60 teńgeden artpaýy tıis. Birinshi sortty unnyń 1 kelisiniń baǵasy - 61 tenge.
Osy sharalardy júzege asyrý maqsatynda ústimizdegi jyldyń 3 tamyzynda Almaty qalasy ákimdigi, astyq óńdep, nan shyǵaratyn kásiporyndar men saýda oryndary arasynda tıisti memorandým jasaldy.
