Almaty ákimdigi múmkindigi shekteýli jandar úshin ınfotýr uıymdastyrmaq
ALMATY. QazAqparat - Almaty ákimdigi múmkindigi shekteýli jandar úshin jergilikti bıýdjet esebinen aqparattyq týr (ınfotýr-red.) uıymdastyrmaq.
Bul týraly «Áleýmettik týrızm: saıahatshylar klýby» halyqaralyq konferentsııasynda qalalyq Týrızm jáne syrtqy baılanystar basqarmasynyń basshysy Tımýr Dúısenǵalıev habarlady.
«Biz keler jyly «Arýjan» qoǵamdyq qorymen birlesken jospar daıyndamaqpyz. Menińshe, onda birneshe másele qamtylady. Sonyń biri bıýdjet esebinen múmkindigi shekteýli týrıster úshin aqparattyq týr uıymdastyrý. Osy sanattaǵy adamdar tobyn alyp, qala bıýdjeti esebinen aqparattyq sapar jasatamyz», - dedi basqarma basshysy.
«Sonymen qatar, biz taǵy bir sharany qolǵa almaqpyz. Múgedek jandar úshin qaladaǵy mádenı, tarıhı, oıyn-saýyq nysandarynda qanshalyqty jaǵdaı jasalǵandyǵyn tizimdeımiz. Biz bul jumystardyń qalaı atqarylyp otyrǵandyǵyn anyqtaý úshin ákimdiktiń baqylaý, tekserý áleýetin iske qosamyz», - dedi T. Dúısenǵalıev.
«Arýjan» qoǵamdyq qory keltirgen resmı derekterge súıensek, búginde múgedek balalar men eresek adamdardyń 70 paıyzy demalys pen qyzmet kórsetý oryndaryna bara almaı otyr. Onyń úlken bir sebebi - múmkindigi shekteýli saıahatshylardy qabyldaýǵa baǵyttalǵan týrızm salasy mamandarynyń atalǵan qyzmetke daıyn emestigi.
