Almaty ákimdigi men «Samuryq-Qazyna» UÁQ Almatynyń odan ári damýy týraly hattamaǵa qol qoıdy
ALMATY. 29 sáýir. QazAqparat /Erbol Azanbek/ - Búgin Almatyda qala ákimi Ahmetjan Esimov pen «Samuryq-Qazyna» UÁQ-nyń basqarma tóraǵasy Tımýr Qulybaev áriptestik jónindegi keńes barysynda Almaty qalasynyń damýy týraly ekijaqty hattamaǵa qol qoıdy.
Hattama boıynsha Almatydaǵy úleskerler máselesin sheshý boıynsha qordyń atqarýshy dırektory-basqarma múshesi Qaırat Aıtekenov pen Almaty qalasy ákiminiń orynbasary Vıktor Doljenkovqa Almatydaǵy turǵyn úılerdiń qurylysy týraly statıstıkalyq-saraptamalyq esep pen málimetter boıynsha aqparat almasyp otyrý júkteldi. Bunyń negizinde taraptar máselelerdi sheship otyrady. Sonymen qatar eki tarap úleskerlik qurylys máselesin sheshý boıynsha tehnıkalyq-uıymdastyrýshylyq máselelerdi sheshýge kelisti. Oǵan sáıkes «Samuryq-Qazyna» UÁQ úleskerlik qurylys nysandaryn tolyq aıaqtaý úshin keminde 21,735 mıllıard teńge qarjy bóledi. Onyń ishinde «Saıran» shaǵyn aýdanyndaǵy qurylys nysandaryn aıaqtaý úshin úshinshi transhpen bólinetin 19,3 mıllıard teńge, «Oskar» keshenin salyp bitirýge 2,435 mıllıard teńge qarastyrylǵan.
«Bıylǵy jyly Almaty qalasynda qalǵan úleskerler máselesin tolyq sheshýge negiz bar», - dedi qala ákimi. Sondaı-aq eki tarap energetıka men qalany gazdandyrý salasynda birqatar jobalardy júzege asyrýǵa ýaǵdalasty.
