Almaty ákimdigi medıtsına kadrlaryn daıarlaýǵa 391 grant bóldi

ALMATY. QazAqparat - Almaty ákimdigi kolledjderde orta medıtsına qyzmetkerlerin daıarlaý úshin 391 grantqa qarjy bóldi. Bul týraly QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda Almaty ákiminiń orynbasary Erjan Babaqumarov málim etti, dep habarlaıdy QazAqparat tilshisi.

Onyń aıtýynsha, bıyl Almaty qalasynyń ákimi Baqytjan Saǵyntaev medıtsına kadrlarynyń tapshylyǵyn tómendetý boıynsha Jol kartasyn bekitti.

Onyń aıasynda medıtsına salasyndaǵy kadrlardy daıarlaýǵa 120 grant bólindi. Rezıdentterdi oqytý 1 qyrkúıekten bastaldy.

Bul – tapshylyqty joıý men mamandardyń jańa býynyn qalyptastyrýdaǵy mańyzdy qadam.

«2021 jylǵy 1 qyrkúıektegi jaǵdaı boıynsha qalada dárigerler tapshylyǵy 215 birlikti, orta medıtsınalyq personal 400-ge jýyq shtattyq birlikti qurady. Orta medıtsınalyq qyzmetkerlerdi daıarlaý úshin olardyń kolledjde oqýyna 391 grantqa qarjy bólindi. Sondaı-aq KVI-men kúreske tartylǵan qyzmetkerlerdi yntalandyrý boıynsha is-sharalar kózdelgen, mamandar úshin 10 páter bólindi, 300 jas maman «Almaty Jastary 3.0» turǵyn úı baǵdarlamasyna qatysa aldy»,- deıdi Erjan Babaqumarov.