Almaty ákimdigi medıtsına kadrlaryn daıarlaý úshin 120 grant bóldi
ALMATY. QazAqparat - Almaty qalasynyń ákimi Baqytjan Saǵyntaevtyń tapsyrmasy boıynsha ákimdik esebinen memlekettik tapsyrys aıasynda medıtsına salasyndaǵy kadrlardy daıarlaýǵa 120 grant bólindi.
Bul - tapshylyqty joıý men mamandardyń jańa býynyn qalyptastyrýdaǵy mańyzdy qadam, dep habarlaıdy QazAqparat tilshisi.
Almaty qalasy ákiminiń orynbasary Erjan Babaqumarovtyń tóraǵalyq etýimen ótken keńeste jergilikti atqarýshy organnyń qarjysy esebinen naryqtyń qajettiligin eskere otyryp, joǵary jáne joǵary oqý ornynan keıingi bilim berý uıymdarynda kadrlardy daıarlaý jónindegi tıisti máseleler qaraldy.
Máselen, Almaty qalasy ákimdiginiń qarjysy esebinen klınıkalyq mamandyqtardy daıarlaý boıynsha 120 grant bólindi, onyń ishinde maqsatty rezıdentýraǵa (110 grant) jáne magıstratýraǵa (10 grant) jáne S. D. Asfendııarov atyndaǵy Qazaq ulttyq medıtsınalyq ýnıversıtetine «epıdemıologııa» mamandyǵyna, Qazaqstan-Reseı medıtsınalyq ýnıversıtetine (ýnıversıtetter memlekettik bilim granttaryn ornalastyrýdyń konkýrstyq tártibi boıynsha anyqtaldy) berildi.
Búginde Almatyda 300-den astam dáriger tapshy. Memlekettik bilim berý tapsyrysy aıasynda respýblıkalyq bıýdjet esebinen klınıkalyq mamandyqtar boıynsha rezıdentýrada oqýǵa 38 grant bólinedi. Ákimdik usynatyn 120 grant medıtsınalyq aqparat júıeleri derekteri negizinde jáne «Almaty qalasynda medıtsına kadrlarynyń tapshylyǵyn tómendetý boıynsha qabyldanyp jatqan sharalar týraly» Jol kartasyn iske asyrý aıasynda, sondaı-aq kadrlarmen qamtamasyz etý salasyndaǵy dınamıkany eskere otyryp jasalǵan asa tapshy dárigerlik mamandyqtardy daıarlaýǵa negizdelgen. Jalpy, kadrlar tapshylyǵyn aldaǵy 2-3 jylda jabý josparlanýda.
Sonymen, granttar kelesi mamandyqtar boıynsha berildi: anestezıologııa jáne reanımatsııa - 35 grant, juqpaly aýrýlar - 18, terapııa - 10, pýlmonologııa - 6, kardıologııa - 2, pedıatrııa - 9, neonatologııa - 3, nevrologııa - 3, otolarıngologııa - 6, klınıkalyq farmakologııa - 2, gastroenterologııa - 6, oftalmologııa - 3, endokrınologııa - 3, balalar hırýrgııasy - 2, travmatologııa jáne ortopedııa - 2, jedel medıtsınalyq kómek - 3, fızıkalyq medıtsına jáne ońaltý - 5, neırohırýrgııa - 2.
Oqý aıaqtalǵannan keıin Almaty qalasynyń memlekettik medıtsına uıymdarynda jáne qalanyń Qoǵamdyq densaýlyq basqarmasyna baǵynyshty uıymdarda tıisti mamandyq boıynsha 5 jyl jumys isteý qarastyrylǵan.
