Almaty ákimdigi mańynda aqyly avtoturaq paıda bolady - A. Kerimbek
ALMATY. QazAqparat- Almaty qalasy ákimdigi mańynda taıaý ýaqytta aqyly avtoturaq paıda bolady. Bul týraly búgin Almatyda ótken baspasóz brıfıngi barysynda Almaty qalasy Tabıǵı resýrstar jáne tabıǵatty paıdalanýdy retteý basqarmasy basshysynyń orynbasary Aıdyn Kerimbek málim etti.
«Almaty ákimdigi mańynda avtokólik qoıatyn oryn bar. Ol jerge júrgizýshiler avtokólikterin qalaı bolsa solaı qoıa beredi. Sondyqtan, taıaý ýaqytta ol jerde aqyly avtoturaq jasalady. Onda arnaıy nómirleri bar avtokólikterdi de qoıýǵa bolady», - dedi A. Kerimbek.
«Almaty spetsparkıng servıs» JShS Biryńǵaı avtomattandyrylǵan avtokólik júıesin Almaty ákimdiginiń tapsyrmasymen ázirlegen. Almaty qalasyn damytý josparyna sáıkes, jobany qolǵa alýdaǵy basty maqsat - qalada avtokólik qoıatyn oryndardy paıdalanýdyń rettelgen júıesin jasaý.
Mamandardyń aıtýynsha, avtokólikter men qoǵamdyq kólikterdiń jáne jaıaý júrginshilerdiń qala kóshelerinde júrýine qolaıly jaǵdaı jasaýdyń bir joly - osy aqyly avtoturaqtar júıesin engizý.
