Almaty ákimdigi kóshelerdi kógaldandyrýda qandaı tásilder qoldanady
ALMATY. QazAqparat - Almatyda avtobýs aıaldamasyn jáne Shyǵys aınalma avtomobıl jolynyń ýchaskesin bezendirýde testilik rejımde tiginen kógaldandyrý ádisi qoldanyldy, dep habarlaıdy QazAqparat.
Jalpy kósheler men túrli aýmaqtar tiginen kógaldandyrylady.
Dostyq dańǵylyndaǵy aıaldamany bezendirý kezinde landshaft dızaınerleri butaly qarapaıym ósimdiktiń 160 gúlin – koleýsty qoldandy. Shyǵys aınalma jolyndaǵy tireý qabyrǵalarynyń birin bezendirý úshin 3450 dana sary jáne qyzǵylt sary tústi tagetes gúlderi qoldanyldy.
«Bezendirý kezinde kógaldandyrýdyń konteınerlik tásili qoldanyldy. Qalyptarda ósirilgen gúlder daıyndalǵan gúlzarlar men gúl qumyralaryna otyrǵyzylady. Jazda gúldený maýsymynda olardy bólshekteý jáne aýystyrý ońaı. Barlyq paıdalanylǵan gúl túrleri qurǵaqshylyqqa jáne qalanyń kúrdeli klımattyq jaǵdaıyna tózimdi», – dedi Almaty qalasy ekologııa jáne qorshaǵan orta basqarmasynyń jasyl qordy basqarý jáne monıtorıng bóliminiń basshysy Oljas Janyspaev.
Tiginen kógaldandyrý keńistikti únemdeıdi, qalaǵa estetıkalyq kórinis beredi jáne ekologııalyq jaǵdaıdy jaqsartady. Bolashaqta ony qala kóshelerin, magıstraldary men alańdaryn bezendirý úshin landshaft dızaınynyń elementteriniń biri retinde paıdalanýǵa bolady.
