Almaty ákimdigi kólikter jyldamdyǵyn azaıtý qajettiligin túsindirdi
ALMATY. QazAqparat - Almaty qalasy ákiminiń orynbasary Erlan Áýkenov Facebook-tegi paraqshasy arqyly qala joldaryndaǵy jyldamdyq rejimin ózgertý qajettigi týraly aıtty, dep habarlaıdy QazAqparat tilshisi.
«Ortasha eseppen álemde jol-kólik oqıǵasy saldarynan kún saıyn 4 myń adam kóz jumady, 55-ten 137 myńǵa jýyq adam jaraqat alyp, múgedek bolyp qalady. Dúnıejúzilik densaýlyq saqtaý uıymynyń statıstıkasy boıynsha, jol apattarynan alǵan jaraqattar balalar men 29 jasqa deıingi jastar óliminiń negizgi sebebi bolyp otyr. Joǵary jyldamdyq - jaıaý júrginshiler, velosıpedshiler men mototsıklshiler úshin jaraqat alý qaýpiniń negizgi faktory», - deıdi Erlan Áýkenov.
Ákim orynbasarynyń atap ótýinshe, osy jyldyń 11 aıynda Almaty qalasynda 4203 jol apaty tirkelip, qaza tapqandardyń sany - 121, zardap shekkender 5 myń adamǵa jetken.
«Ólim jaǵdaıymen aıaqtalatyn jol-kólik oqıǵalarynyń deni 60-80 km/saǵat joǵary jyldamdyq rejimi engizilgen joldarda (Ál-Farabı, Tóle bı, Raıymbek, Rysqulov, Saıyn, Momyshuly, Shyǵys aınalma joly jáne basqalar) tirkeledi. Ásirese, Raıymbek dańǵyly (277 jol-kólik oqıǵasy, 353 adam jaraqat aldy, 12 adam qaza boldy), Rysqulov dańǵyly (147 jol-kólik oqıǵasy, 217 adam jaraqat aldy, 11 adam ajal qushty), Soltústik aınalma joly (147 jol apaty, 174 adam jaraqat aldy, 11 adam mert boldy), Momyshuly (105 jol apaty, 130 adam jaraqat aldy, 3 adam qaza boldy), Saıyn (80 jol-kólik oqıǵasy, 91 adam jaraqat aldy, 4 adam ajal qushty), Ál-Farabı dańǵyly (60 jol-kólik oqıǵasy, 72 adam jaraqattandy, 4 adam kóz jumdy) kóshelerinde jol-kólik oqıǵalary kóbirek tirkelgen», - deıdi ol.
Erlan Áýkenov sondaı-aq, maksımaldy jyldamdyq tómendetilgen birqatar elderde (Ońtústik Afrıka, Belgııa, Fınlıandııa, Frantsııa, Ulybrıtanııa, Germanııa, AQSh jáne Jańa Zelandııa) apattardyń sany azaıǵany belgili bolǵanyn aıtady.
«Máselen, Mınsk qalasynda birneshe jyldar boıy basqa da sharalarmen birge, jyldamdyqty azaıtý arqyly jol-kólik oqıǵalary men jaraqattardy 6 esege azaıtýǵa jáne qalany Eýropanyń eń qaýipsiz aımaǵyna aınaldyrýǵa qol jetkizilgen», - deıdi ol.
Onyń aıtýyna qaraǵanda, avtokólikterdiń jyldamdyǵy 30 km/saǵ bolǵan jaǵdaıda jaıaý júrginshilerdiń 90 paıyzynyń aman qalý múmkindigi bar.
«Kólik júrgizýshileriniń teris kózqarasyna qaramastan, jyldamdyq lımıtin tómendetý Almatyda jyl saıyn júzdegen adamnyń ómirin saqtap qalýǵa, myńdaǵan adamnyń múgedek bolyp qalýynyń aldyn alaýǵa múmkindik beredi», - deıdi ol.
Avtory Maııa Teńizbaeva
