Almaty ákimdigi Kókjaılaý kýrorty qurylysyna ınvestor izdep jatyr
ALMATY. QazAqparat - Almaty ákimdigi Kókjaılaý kýrorty qurylysyna ınvestor izdep jatyr, dep habarlaıdy QazAqparat tilshisi.
Ákim orynbasary Almas Mádıev Kókjaılaý kýrorty qurylysy jobasynyń qalaı júzege asyp jatqanyn aıtty.
«Qazir kýrorttyń tehnıkalyq ekonomıkalyq negizdemesi jasalyp jatyr. Qujatta óńirdiń klımattyq tabıǵı jaǵdaıy eskeriledi. Qazir kommýnıkatsııa men ınfraqurylym jelileri júrgizilip jatyr», - dedi A.Mádıev Almatyda ótip jatqan 5-ınvestforým barysynda.
Onyń aıtýynsha, bul jobanyń quny óte joǵary bolmaq.
«Qazir Kókjaılaý jobasyn ınvestorlarmen talqylap jatyrmyz. Onyń ishinde Eýrazııalyq damý jáne qaıta qurý banki bar.Bul joba biz úshin óte mańyzdy. Sebebi, qalanyń týrıstik áleýetine úlken serpin beredi», - dedi ol.
«Týrızm - qarqyndy damyp kele jatqan sala. Taý shańǵysy týrızmi jaǵajaı týrızminen 5 ese artyq tabys ákeledi. jańa jumys oryndary qurylady. Ony damytý úshin taza aýa kerek. Ekologııalyq ahýaldy jaqsartý úshin barynsha jaǵdaı jasap jatyrmyz. Qalada turaqty kólik júıesi qalyptasty», - dedi Baýyrjan Baıbek.
Sonymen qatar, forým barysynda Almaty halyqaralyq áýejaıy qaıta jasalatyny belgili boldy.
«Zamanaýı VIP-termınal, tranzıttik aımaqtyń halyqaralyq ushý zaly keńeıtiledi. Tamaqtaný salasynda qyzmet kórsetetin kompanııalardyń jumysyn jaqsartýǵa halyqaralyq kompanııalardy shaqyramyz. Áýejaı basshylyǵy ekinshi termınaldyń qurylysyn bastaý týraly sheshim qabyldady», - dedi Baýyrjan Baıbek.
Qala basshysynyń aıtýynsha, qurylys jumystary birneshe jyl boıy jalǵasady. Investıtsııa kólemi ázirge belgisiz. Bıyl áýejaıdyń ushý-qoný joly qaıta jóndeýden ótip jatyr.
Aıta ketý kerek, «Almaty-2020» damý baǵdarlamasynda Almaty qalasynda álemdik deńgeıdegi jańa áýejaı, jańa jolaıryqtary jáne kólik magıstraldary (onyń ishinde ÚAAJ) qurylysyn salý, sonymen qatar logıstıkalyq qyzmetterdi damytý, halyqaralyq kólik, logıstıkalyq hab retinde damytý jaıly aıtylǵan.
