Almaty ákimdigi qannyń qaterli isigimen aýyratyn qyzǵa 2 mln teńge bólmek
ALMATY. QazAqparat - Almaty ákimdigi qannyń qaterli isigimen aýyratyn qyz balaǵa 2 mln teńge bóletin boldy, dep habarlaıdy QazAqparat tilshisi.
2016 jyldyń aqpanynda dárigerler Anıa Ivanovaǵa qannyń qaterli isigi dıagnozyn qoıǵan bolatyn. 1 jylǵa sozylǵan remıssııadan soń 2017 jyldyń qańtarynda qyzdyń jaǵdaıy kúrt nasharlap ketken.
Almatylyq jýrnalıster Anıanyń basyndaǵy jaǵdaıdy byltyrdan beri jerııalap keledi. Áleýmettik jeli arqyly taralǵan aqparattyń arqasynda 1 mln teńge jınaldy.
Bıyl mamyrda QR Densaýlyq saqtaý mınıstrligi Stambýlda jasalatyn otaǵa qarjy bóletin boldy. Alaıda odan bólek Anıa men anasynyń Túrkııada júrip-turýyna da qomaqty qarjy qajet bolyp otyr.
«Anıa men anasyna Stambýlda júrip turýy úshin shamamen 9 myń dollardaı kerek. Mundaı soma olarda joq. Sondyqtan, aqyldasa kele qala ákimine ujymmen hat jazdyq. Búginde ákimniń kómektesýge daıar ekendigin estip qýanyp otyrmyz. Anıa men anasy 2 mln teńge alatyn boldy. Osy ıgi iske úles qosqandarǵa, ásirese Baýyrjan Qydyrǵalıulyna alǵys bildirgim keledi», - dedi jýrnalıst.
Anıanyń anasynyń da alǵysy sheksiz.
«Aıtarǵa sózim joq. Bizge kómekteskenderge, ákimge úlken rahmet. Jýrnalıster, óz erkimen kómekke kelgenderge de alǵysym sheksiz. Ózge elde birneshe aı turyp, analız tapsyryp, ota jasatýǵa týra keledi», - dedi Anıanyń anasy.
«Almaty ákiminiń atyna materıaldyq kómek kórsetý týraly ótinim keldi. Ákimdik demeýshi tapty. Búgin qarjyny Anıanyń anasynyń shotyna aýdarady», - dedi ákimdiktiń baspasóz qyzmetinen.
Naýqas bala búgin anasymen Túrkııaǵa ushyp ketedi.
