Almaty ákimdigi qalaaralyq zańsyz tasymaldaýshylarǵa kúresti qolǵa aldy
ALMATY. QazAqparat - Almaty bıligi qalaaralyq jolaýshylar tasymaly naryǵynda zańsyz jumys istep júrgen kompanııalardy baqylaýǵa aldy, dep habarlaıdy QazAqparat tilshisi.
Jaqynda polıtsııa departamenti kólikti baqylaý ınspektsııasymen birge monıtorıng júrgizgen bolatyn.
Qalalyq ákimdiktiń baspasóz qyzmetiniń habarlaýynsha, búginde Almatyǵa kún saıyn 150 avtobýs kelip-ketedi. Olardyń tek 60-y ǵana resmı túrde zańdy jumys jasaıdy.
«Qalaaralyq jáne qalaǵa jaqyn mańǵa júretin kólik trafıginiń 60%-dan astamy jasyryn tasymaldaýshylardyń qolynda ketip otyr. Mundaı reısterdegi jolaýshylar aǵyny 30-40 myń adam bolyp otyr. Kún saıyn zańsyz tasymaldaýshylar 20-28 myń adamdy tasymaldaıdy. Eńbek mıgrantynyń barlyq tarfıgin jasyryn tasymaldaýshylar qamtýda", - dedi Almaty qalasy Jolaýshylar kóligi men avtomobıl joldary basqarmasy basshysynyń orynbasary Erlan Ádilov.
Mamandardyń aıtýynsha, kóbinese zańsyz qyzmet etetinder jolaýshylardyń ómirine qaýip tóndiredi.
Salonda eritkish lampany, janǵysh materıaldardy alyp júrý, tehnıkalyq baqylaýdan ótpeý apatty jaǵdaılarǵa ǵana emes, adam ólimine de ákelýi múmkin.
«BAQ-ta taraǵan aqparatqa sáıkes olardyń kesirinen Almaty-Bishkek jolynda jol apatynan 20-dan astam adam zardap shekti. Zańsyz tasymaldaýshylar tehnıkalyq baqylaýdyń qoldan jasalǵan kartalaryn kórsetedi, reıs aldynda medıtsınalyq baqylaýdan ótpeıdi. Tabystary joǵary bolǵanymen, salyq tóleýden qashyp, jolaýshylardyń ómirine qaýip tóndiredi. Olardy tasymaldaý kezinde eshqandaı jaǵdaı jasamaıdy», - dedi jolaýshylar tasymaly kásiporyndary qaýymdastyǵynyń prezıdenti Dana Ahatova.
Sondaı-aq, jasyryn bıznes resmı tasymaldaýshylar jumysyna jáne jergilikti bıýdjetke edáýir nuqsan keltiredi.
Memleket basshysy Qazaqstan halqyna Joldaýynda ekonomıkadaǵy kóleńkeli aınalymdy 3 jyl ishinde kem degende 40%-ǵa deıin qysqartý kerektigin atap ótken edi.
Búginde osy baǵytta ákimdik tarapynan kóp jumys atqaryldy.
«Sálem» avtobeketi iske qosyldy ol jaqyn arada Túrkistan jáne ShQO jolaýshylaryna jıi qyzmet kórsetedi. Jaqynda «Saıran», «Saıahat» avtovokzaldarynan da jańa baǵyttar ashylady.
Búginde «Saıahat» beketi 10-15%-ǵa ǵana jumys istep tur.
Pılotty rejimde qala mańyna qatynaıtyn áleýmettik baǵyttar ashylatyn bolady. Bıletterdi onlaın satýdyń biryńǵaı elektrondy júıesin engizý qarastyrylýda. Ókiletti organdar men bazar basshylaryna júk tasymaldaý úshin logıstıkalyq kompanııalardy tartý eskertildi.
«Jyl aıaǵyna deıin zańsyz tasymaldaýshylar qyzmeti joıylady, negizgi baǵyttar resmı túrde qamtamasyz etiledi», - deıdi Jolaýshylar kóligi jáne avtomobıl joldary basqarmasynyń ókilderi.
