Almaty ákimdigi qala joldaryn jóndeýge 7 mlrd. teńge bóldi
Baýyrjan Baıbek aýdan ákimderi men basqarma basshylaryna jumystyń sapasy men ýaqtyly oryndalýyn tapsyrdy.
Qalalyq ákimdiktiń habarlaýynsha, bıyl 120 shaqyrymnan astam jol ortasha jóndelip, 85 myń sharshy metr trotýar men 130 beket alańdary salynady. Jol-jóndeý jumystaryna 7 mlrd. teńge, onyń ishinde kezekti jóndeýge 1 mlrd. teńge, trotýarlar men beketti núktelerdi retke keltirýge 500 mln. teńge, ortasha jóndeýge 5,5 mlrd. teńge bólingen.
«Birinshi kezekte uzyndyǵy 37 shaqyrym bolatyn 34 kóshege, sonymen qatar, 12 magıstraldy kósheler men 23 aýdandyq mańyzy bar kóshelerge jóndeý jumystary júrgiziledi. Atap óterlik jaıt, uzyndyǵy 31 shaqyrym bolatyn 19 kóshege de ortasha jóndeý júrgizýdiń smetalyq qujattary jasaldy. Qala kóshelerindegi aqaýlardy taýyp, ári jóndeý úshin 4 merdigerlik uıym men 12 brıgada jumys istep jatyr. Osy aptanyń ishinde bulardyń sany 28-ge artatyn bolady», - dedi Jolaýshylar kóligi jáne avtomobıl joldary basqarmasynyń basshysy Maqsut Isahov.
Ol Saıyn kóshesinen Jandosov kóshesiniń boıymen Taýsamaly poselkesine deıin kúrdeli jóndeý jumystarynyń júrip jatqanyn aıtty. Jóndeletin aýmaqtyń jalpy uzyndyǵy - 2,8 shaqyrym. Joba quny - 1 134,0 mıllıon teńge. Jóndeý jumystary barysynda joldyń kólik qozǵalysy bóligi 4 jolaqqa deıin keńeıedi, Qarǵaly ózeniniń boıyndaǵy kópir qaıta jasalady, velojoldar men trotýarlar salynady.
Atap óterlik jaıt, joldardy jóndeý jumystarynda zamanaýı tehnıka paıdalanylady. Asfalt tóseıtin jańa mashına 8 tonna asfalt daıyndap, onyń temperatýrasyn 180 gradýsta saqtaı alady. Bul tehnıkanyń ereksheligi ol qys kezinde de joldardy jóndeı beredi. Bul tehnıka Qazaqstanda bireý ǵana. Bolashaqta osyndaı birneshe tehnıka satyp alý josparlanýda.
