Almaty ákimdigi ǵımaratyn jóndeý 2023 jyly aıaqtalady

ALMATY. QazAqparat – Almaty ákimdigi ǵımaratyn qalpyna keltirý jumystary aldaǵy kóktemde aıaqtalady. Bul týraly Ortalyq kommýnıkatsııalar qyzmetinde ótken brıfıngide qala ákimi Erbolat Dosaev aıtty, dep habarlaıdy QazAqparat tilshisi.

Baspasóz brıfıngi barysynda jýrnalıster ákimge Almatydaǵy órtengen Prezıdent rezıdentsııasy jáne ákimdik ǵımaratyna qatysty suraq qoıdy.

«Rezıdentsııa buzylyp jatyr. Buryn bul nysan ákimshilik ǵımarat bolyp belgilense, endi ony saıabaq aımaǵyna aýystyrý qajet. Ákimdikke jaqyn ornalasqan saıabaqpen biriktirmekpiz. Ol Sátbaev kóshesine deıin sozylady», - deıdi Erbolat Dosaev.

Ákim qala qurylysy keńesiniń múshelerimen saıabaq aımaǵynyń jobalyq-smetalyq qujattamasy talqylanatynyn jetkizdi.

«Al, ǵımaratty jóndeıtin bes kompanııadan konsortsıým qurdyq. Ony buzýdyń qajeti joq dep oılaımyn. Jumysty jyl aıaǵyna deıin aıaqtaımyz dep josparlaǵanbyz, biraq kúrdeli jobalyq sheshimderge baılanysty keıinge qaldyryldy. Bul ǵımarattyń ózine emes, metaly janǵan kúmbezdi zalyna baılanysty. QazQSǴZI shatyrdy jeńildetip, jeńil ári qaýipsiz etýdiń sheshimin tapty. Ákimdiktiń jóndeý jumystary kelesi jyly, ıaǵnı 2023 jyly Naýryz meıramyna deıin aıaqtalýy tıis», - dedi ákim.