Almaty ákimdigi demontajdalǵan granıt taqtaıshalardy qaıda jiberedi

ALMATY. QazAqparat - Almatyda demontajdalǵan jolaıryqtardyń tireý qabyrǵalaryndaǵy granıt taqtaıshalar joıylmaıdy. Bul taqtaıshalar jaıaý júrginshiler joly men kóshelerdi abattandyrýǵa, sondaı-aq áleýmettik nysandardyń syrtqy árleýi kezinde paıdalanylady. Bul týraly Almaty qalalyq Mobıldilik basqarmasy aıtty, dep habarlaıdy QazAqparat tilshisi.

Qalalyq mobıldilik basqarmasynyń habarlaýynsha, 5 jolaıryqtan alynǵan taqtaıshalardyń barlyǵy iske asyrylatyn bolady.

«Qazir bir jolaıryqtan 6,5 myń sharshy metr taqtaısha alynyp, onyń 2,1 myń sharshy metri týnneldiń tómengi qataryn árleýge jumsaldy. 1,2 myń sharshy metr jaramsyz taqtaısha jaıaý júrginshiler jolyn salýǵa, sonymen qatar mektepter men aýrýhanalardyń syrtyn jóndeýge jumsalady. Tutas taqtaıshalar Raıymbek-Rozybakıev, Súıinbaı-Rozybakıev jáne Jarokov-ál-Farabı qıylystaryndaǵy jol-kólik aıryqtaryn jóndeý kezinde paıdalanylyp jatyr», - dedi basqarmadan.

Sonymen qatar, qala mektepterinen taqtaıshalarǵa suranys kóp. Jóndeý jumystary shilde aıynda bastalady. Bilim mekemeleriniń basshylary aıtqandaı, mektepterdi jóndeý kezinde qarajattyń basym bóligi ınjenerlik jelilerge shyǵyndalady da, syrtqy abattandyrý jumystaryna kelgende únemdeýge týra keledi. Al bul taqtaıshalar jóndeý jumystaryn aıtarlyqtaı shyǵynsyz aıaqtaýǵa múmkindik beredi.