Almaty ákimdigi dárihanalardaǵy baǵanyń turaqsyzdyǵyna qatysty pikir bildirdi
ALMATY. QazAqparat - Almaty qalasy Densaýlyq saqtaý basqarmasynyń basshysy Ýálıhan Ahmetov qaladyǵy dárihanalarda bir dáriniń baǵasy ártúrli baǵamen satylýyna qatysty pikir bildirdi, dep habarlaıdy QazAqparat.
«Bul qala turǵyndaryn mazalap otyrǵan suraq. Qala dárihanalarynda dáriler kepildengen kólemde beriledi, ıaǵnı, keıbir adamdar tegin, jeńildik boıynsha, keıbiri óz aqshasyna satyp alady. Qala turǵyndaryn negizsiz qymbatshylyqtan saqtaý úshin jyl basynda qala ákimdigi men Densaýlyq saqtaý jáne áleýmettik damý mınıstrliginiń Farmatsevtıkalyq baqylaý komıteti jáne óndirýshi, tasymaldaýshy kompanııalarmen arada memorandým jasalady. Mundaı memorandým jyl saıyn jasalyp, komıtet baǵany óz baqylaýyna alady. Bul rette biz otandyq óndirýshilerdiń dárileriniń qymbattamaýyna mán berdik», - dedi Ýálıhan Ahmetov.
Sonymen qatar, ol osy maqsatta ár dárihanada otandyq óndirýshi kommertsııalyq uıymdarmen baǵany kótermeý týraly kelisimshart bar ekenin jetkizdi.
«Ókinishtisi, biz shet elden keletin dárilerdiń baǵasyn jıi baqylaı almaımyz. Ózderińiz biletindeı, buǵan ınflıatsııa, devalvatsııanyń áseri bar. Biraq, biz kepildengen tegin medıtsınalyq kómektiń tolyǵymen jetkilikti bolýyn qamtamasyz etemiz», - dedi basqarma basshysy.
