Almaty ákimdigi: Dárihanada dári qymbattaǵan joq

ALMATY. QazAqparat – Almaty ákimdigi dárihanalarda dári baǵasy baqylaýǵa alynǵanyn aıtyp, osy ýaqytqa deıin zańbuzýshylyq tirkelmegenine sendirdi, dep habarlaıdy QazAqparat tilshisi.

QR farmatsevtıkalyq qyzmetti qoldaý jáne damytý qaýymdastyǵynyń prezıdenti Marına Dýrmanova QR DSM №104 buıryǵyna sáıkes, dáriniń shekti baǵasy belgilengenin aıtty.

«Bizde dári baǵasyn memleket retteıdi. Sondyqtan, árbir ózin qurmetteıtin bıznesmen osy shekti baǵany asyp ketpeıdi. Óıtkeni birinshi márte oǵan úlken kólemde aıyppul salynady. Ekinshi ret kásiporynnyń jumysy 6 aıǵa toqtatylýy múmkin. Bıznes jabyldy dep sanaýǵa da bolady», - dedi ol.

Onyń aıtýynsha, dárihanalar tarapynan zańbuzýshylyq tirkelmedi.

«Bizde shekti baǵa bar. Mysaly paratsetamol buryn 70-80 teńge bolǵan. Shekti baǵasy - 128 teńge. Odan qymbat bolýy múmkin emes. Dárihanalardyń bireýi de bul baǵany kótergen emes. Baǵany kóterý týraly áńgime boldy. Biraq, baǵa qymbattamady», - dedi Marına Dýrmanova.

Al qala ákiminiń orynbasary Saparbek Tuıaqbaev qala dárihanalaryndaǵy baǵany arnaıy komıssııa baqylaýda ustap otyrǵanyn aıtty.

«Baǵa kóterý boıynsha bir de bir derek kezdespedi. Biz qatań baqylaýǵa almas buryn bireýler 3 paratsetamol ornyna 100 qaptama satyp alyp otyrǵan. Sosyn ony ınternet arqyly satyp otyrǵan. Bul derekterdi biz polıtsııaǵa berdik. 11 derek anyqtaldy», - dedi S.Tuıaqbaev.

Onyń aıtýynsha, qalada 800 dárihana bar. Olardyń jumysy ákimdik pen farmkompanııalar arasyndaǵy kelisim negizinde baqylaýǵa alynǵan.