Almaty ákimdigi Botanıkalyq baq aldyndaǵy aǵashtar nelikten kesilgenin túsindirdi
ALMATY. QazAqparat – Almatyda Botanıkalyq baqqa qarsy bettegi Baızaqov-Tımırıazev kósheleriniń qıylysynda turǵan aǵashtar kesildi, dep habarlaıdy QazAqparat tilshisi.
Almatynyń jasyl ekonomıka basqarmasy osy jaıtqa qatysty túsinik berdi.
«Turǵyndarǵa qyzmet kórsetetin ǵımarat salyp jatqan jeke tulǵa S.Aksenov «Almatynyń jasyl jelekterdi kútý jáne qorǵaý erejelerine» sáıkes, ǵımarat qurylysyna kedergi bolatyn aǵashtardy kesý úshin talap etiletin qujattardyń bárin ákeldi», - dep málimdedi basqarma.
Vedomstvo deregine súıensek, 25 qazan kúni S.Aksenovtiń 10 aǵashty kesýine ruqsat berilgen.
«Jeke tulǵa S.Aksenov kesilgen aǵashtardyń ornyna 2019 jyldyń 25 qarashasyna deıin jalpy qala aýmaǵynda 50 kóshet otyrǵyzýǵa mindetteldi. Ǵımarattyń qurylysyna Almaty qalasynyń quzyrly mekemeleri kelisim bergen», - deıdi basqarma ókilderi.
