Almaty ákimdigi balalarǵa golf oınaýdy úıretpek
ASTANA. QazAqparat - Almaty qalasynyń ákimdigi men «Nurtaý» golf-klýby birlesip, 6-13 jas aralyǵyndaǵy jasóspirimderge golf oınaýdy tegin úıretpek, dep habarlaıdy QazAqparat.
Kásipqoı bapkerler kún saıyn - dúısenbiden jumaǵa deıin, toptarǵa bólingen balalar arasynda sheberlik sabaqtaryn ótkizedi. Sonymen qatar, qatysýshylar ózderine yńǵaıly ýaqyt pen kúndi tańdap, aptasyna eki ret bir saǵattan jattyǵa alady.
«Sabaqtar aqysyz ótkiziledi. Barlyǵyn kerekti jabdyqtarmen ózimiz qamtamasyz etemiz. 6-13 jas aralyǵyndaǵy jetkinshekter bizge kelip, golf oıynynyń ádisterin meńgere alady. Qazirdiń ózinde 300 bala túrli qala aýdandarynan kelip, qyzýǵyshylyǵyn tanytyp jatyr. Biz qatysýshylar sanyn kóbeıtpekpiz, maqsatymyz - golfty elge tanytý. Qalanyń barlyǵyn qamtyp, jaqsy oıynshylardy irikteımiz», - dep atap ótti balalar akademııasynyń bas bapkeri Aleksandr Vongaı.
Onyń aıtýynsha, golf elimiz úshin jas sport túri, endi ǵana damyp keledi. Alaıda, elimizde jastar úlgi tutarlyq golf sheberleri az emes. Máselen, halyqaralyq saıystardyń chempıony Dáýlet Tileýbaev. Ol qazir AQSh-ta jattyǵý ústinde.
Golf - sporttyq oıyn, 2016 jyly Olımpıada oıyndaryna engizildi.
Baǵdarlama týraly tolyq aqparatty Nurtau.kz saıtynan bilýge bolady.
