Almaty ákimdigi balalardyń sport úıirmelerine qansha qarjy bóldi
ALMATY. QazAqparat – Almatylyq 41 myń bala men jasóspirimder sport sektsııalaryna tegin qatysa alady. Bul maqsatqa Almaty qalasynyń ákimdigi 956 mln teńge bóldi. Bul týraly qalalyq Sport basqarmasynyń basshysy Rústem Baıseıtov aıtty, dep habarlaıdy QazAqparat tilshisi.
Rústem Baıseıitovtiń aıtýynsha, 4 jastan 18 jasqa deıingi balalar qala boıynsha 71 baǵyt boıynsha tegin sektsııalarmen qamtylǵan.
Spıkerdiń sózinshe, Memleket basshysy bastamashylyq etken joba Biryńǵaı Respýblıkalyq ARTSPORT.EDU.KZ.elektrondy platformada júzege asyrylyp jatyr.
«Ata-analarǵa Almatydaǵy barlyq tegin sektsııalarmen tanysyp, úıden shyqpaı-aq balaǵa eń qolaılysyn tańdaý múmkindigi paıda boldy. Bul platforma balany onlaın rejıminde jazýǵa múmkindik beredi, bul jumys isteıtin ata-analar úshin óte yńǵaıly. Bıyl barlyǵy 53 526 ótinim berilip, 37 sport túrinen 41 530 ótinim boıynsha vaýcherler iske qosyldy», - dep atap ótti Sport basqarmasynyń basshysy.
Onyń aıtýynsha, almatylyq balalar arasynda fýtbol, shahmat, taekvondo, dzıýdo jáne júzý boıynsha tegin sektsııalar suranysqa ıe.
Ol ata-analardyń balanyń turǵylyqty jerinen jaıaý qashyqtyqta sektsııalardy tańdaýǵa múmkindigi bar ekenin aıtty.
Mysaly, ár aýdanda 100 bos ýaqyt ortalyǵy bar, onda 8 myńnan astam adamdy qamtıtyn tegin negizde 36 sport sektsııalary men úıirmeleri jumys isteıdi.
2023 jylǵa qaraı ortalyqtar sanyn 200-ge deıin arttyrý josparlanǵan, bıyl qosymsha taǵy 50-i ashyldy.
Eske salsaq, ótken jyldyń 30 jeltoqsanynda Qazaqstan Prezıdenti Qasym-Jomart Toqaev mádenıet, dene shynyqtyrý jáne sport máseleleri jónindegi Zańǵa qol qoıdy. Qujatta halyqtyń barlyq jas toptary arasynda dene shynyqtyrý men buqaralyq sportty damytý jáne balalar úshin sporttyq ınfraqurylymnyń barynsha qoljetimdiligin qamtamasyz etý jónindegi sharalar kózdelgen.
