Almaty ákimdigi «avtobýstar zıratyna» qatysty pikir bildirdi
Almaty qalasy máslıhatynyń kezekten tys VII sessııasy barysynda depýtat, qoǵam qaıratkeri, ekolog Tımýr Eleýsizov «avtobýstar zıraty» máselesin kóterdi.
«Biz jalpy uzaq jyldar boıy ákimdikti jolaýshy tasymalyn sýbsıdııalaýyn qoldap keldik. Sebebi onyń bári shyǵyn. Biraq qazir áleýmettik jelide 600 avtobýs pen 100 trolleıbýs jaıly «avtobýs zıraty» máselesi kóterilip jatyr. 600 avtobýs ne úshin jumys istemeıdi, nege olardyń bólshegi satyp alynyp, ary qaraı qoldanysqa enbeı jatty?» - degen depýtat ortaǵa saýal tastady.
Qalalyq mobıldilik basqarmasynyń basshysy Saǵyndyq Telibaev bul turaqta 823 avtobýs baryn, onyń 651-in senimdi basqarý negizinde «Green Bus» JShS paıdalanyp kelgenin aıtty.
«Bul avtobýstar 2010-2013 jyldary shyǵarylǵan. Qazir olardy tozyǵy jetkendikten jóndeý múmkin emes. Al qalǵan 157 avtobýsty Almaty oblysynyń balansyna berdik. Jalpy sany 15 bolatyn 18 metrlik LıAZ avtobýstary turaqta tur. Qazir olardyń bólshekteri satyp alynyp jatyr jáne bıyl bul 15 avtobýsty jóndeýdi josparlap otyrmyz», - dedi Saǵyndyq Telibaev.
Shilde aıynda áleýmettik jeli qoldanýshylary Almaty turǵyny jarııalaǵan fotosýretterge qarap, óz narazylyq bildirgen bolatyn.
Keıin Indýstrııa jáne ınfraqurylymdyq damý mınıstri Marat Qarabaev Almaty qalasynyń mańynda qańtarylyp turǵan 300 avtobýsqa qatysty pikir bildirdi.
