Almaty ákimdigi aýa raıyna baılanysty júrgizýshilerge úndeý jasady

ALMATY. QazAqparat - Almaty ákimdiginiń kommýnaldyq ınfraqurylymdy damytý basqarmasy aýa raıyna baılanysty kólik júrgizýshilerine úndeý jasady, dep habarlaıdy QazAqparat tilshisi.

«Qazgıdromet» RMK boljamy boıynsha búgin, 8 qarashada Almatyda kúni boıy qatty jańbyr jaýyp, arty dymqyl qarǵa ulasady dep kútilip otyr.

Túnde aýa temperatýrasy -1 -3 gradýsqa deıin tómendeıdi, kóktaıǵaq bolady.

«Joldaǵy qaýipsizdikti qamtamasyz etý maqsatynda avtokólik júrgizýshilerine jazǵy dóńgelekterin qysqy dóńgelekke ýaqtyly aýystyrýdy usynamyz. Jolda kóktaıǵaq ári qozǵalys bóliginde taıǵanaq qabyrshyqtardyń paıda bolýyna baılanysty júrgizýshiler qozǵalys jyldamdyǵyn tómendetip, avtomobılder arasyndaǵy qashyqtyqty arttyryp, búıir aralyqty saqtaýy, kenetten manevr jasaýdan, tejegishti kilt basýdan aýlaq bolǵany jón»,- delingen habarlamada.

Sınoptıkterdiń boljamynsha, búgin atmosferalyq fronttarǵa baılanysty Qazaqstan Respýblıkasynyń basym bóliginde turaqsyz aýa raıy saqtalady, jańbyr jáne qar jaýady.

Qazaqstannyń ońtústiginde, ońtústik-shyǵysynda qatty jaýyn-shashyn jaýady. Respýblıka boıynsha tuman túsip, kóktaıǵaq bolady, jel kúsheıedi.