Almaty ákimdigi Astananyń qalyptasýyna úles qosqan tulǵalardy marapattaıdy
ALMATY. QazAqparat - Prezıdenttiń elimiz astanasyn aýystyrý sheshimine qoldaý bildirip, jańa elordanyń qalyptasýyna úles qosqan tulǵalar marapattalatyn bolady, dep habarlaıdy QazAqparat tilshisi.
Naqtyraq aıtqanda, «Astana - Ardaǵym» merekelik syılyǵymen elimizdiń bas qalasyn kóshirý týraly Prezıdenttiń sheshimine barynsha qoldaý kórsetken jáne elordanyń qalyptasýyna úles qosqan - ómiriniń basym bóligin Almaty qalasynda ótkizgen almatylyqtar men qaıratkerler marapattalady.
Almaty qalasy ákimdiginiń baspasóz qyzmetinen málim etkendeı, «Astana - Ardaǵym» tuńǵysh syılyǵyn tapsyrý sharasy elordanyń 20 jyldyǵyna oraılastyrylǵan. Marapattaý rásimi 10 jeltoqsan kúni Respýblıka saraıynda ótedi.
Syılyq 20 nomınatsııa boıynsha belgilengen, olar: bilim men ǵylym, sáýlet pen qurylys, densaýlyq saqtaý, sport, óner, kınematografııa, jýrnalıstıka jáne ádebıet salalary.
Shara birneshe kezeńnen turady - nomınanttardy usyný, elektrondy daýys berý arqyly 20 fınalısti anyqtaý jáne jeńimpazdardy marapttaý.
Ákimdikten habarlaǵandaı, irikteý konkýrstyq komıssııanyń baqylaýymen ınternette ashyq daýys berý arqyly ótkizilmek. Ol úshin 1 jeltoqsanda arnaıy saıt ashylyp, 5-8 jeltoqsan aralyǵynda daýys berý júredi.
«Sharany 10 jeltoqsanda ótkizý tekke alynyp otyrǵan joq, óıtkeni 1997 jyldyń dál osy kúni - 10 jeltoqsanda Memleket basshysynyń sheshimimen astanany resmı kóshirý bastalǵan bolatyn. «Astana - Ardaǵym» syılyǵy 2018 jyldyń 6 shildesine deıin astananyń mereıli merekesine oraı ótetin alqaly sharalardyń alǵashqysy bolyp sanalady», - delingen habarlamada.
