Almaty ákimdigi áleýmettik mańyzy joǵary azyq-túliktiń baǵasyn qadaǵalaýda
ALMATY. QazAqparat - Almaty ákimdiginde ınflıatsııalyq protsesterdi tejeý men baǵalardy qadaǵalaý boıynsha shtabtyń otyrysy boldy.
Atalǵan shara Jańa jyl meıramy qarsańynda baǵalardyń negizsiz ósýiniń aldyn alý maqsatymen ótkizildi.
Almatyda áleýmettik mańyzy joǵary azyq-túliktiń 18 túri boıynsha baǵa 1%-4%-ǵa artty. Al, 6 túri boıynsha 1%-ǵa ǵana artty.
Qala ákimdigi usynǵan statıstıkalyq derek boıynsha, tek qana shetelden ákelinetin azyq-túlik qymbattaǵan. Al, otandyq ónimderdiń baǵasynda óte ózgeris joq.
Jeltoqsan aıynda áleýmettik mańyzy joǵary azyq-túlikter 1,7%-ǵa ósken.
Sondaı-aq, qazirgi tańda qala ákimdigi Ońtústik Qazaqstannyń Saryaǵash aımaǵynan tikeleı ónim jetkizý máselesi sheshilýde. Bul ortadaǵy deldaldardy joıyp, baǵanyń negizsiz kóterilýine tosqaýyl bolmaq. Saryaǵash kásipkerlerimen jyl sońyna deıin 80 tonna qııar men qyzanaq jetkizý boıynsha kelisimge qol jetkizilgen.
Sonymen qatar, «Alsad» kompanııasymen 1 jumyrtqany 16 teńgeden satý týraly kelisimge qol jetkizildi. Jumyrtqa «Magnum Cash & Carry» saýda jelisi arqyly saýdalanatyn bolady.
