Almaty ákimdigi 20 myń oqýshyny mektepke daıyndaıdy
ALMATY. QazAqparat- Almatyda muqtaj otbasylardan shyqqan 20 myń oqýshy Jappaı oqytý qorynan kómek alady, dep habarlaıdy QazAqparat tilshisi.
Bıyl Jappaı oqytý qorynan beriletin kómek somasy bir balaǵy - 43 myń teńge. Bul mektep formasy men keńse zattaryn satyp alý úshin beriledi. Aıta keteıik, Jappaı oqytý qory jergilikti bıýdjetten qarjylandyrylady.
«Bıyl materıaldyq kómek alý quqyǵyna 20 myńǵa jýyq oqýshy ıe boldy. Atap aıtar bolsaq, oǵan memlekettik ataýly áleýmettik kómek alatyndar, jan basyna shaqqandaǵy ortasha tabysy eń tómengi kúnkóris deńgeıinen tómen memlekettik AÁK almaıtyndar, jetim balalar jáne ata-anasynyń qamqorlyǵynsyz qalǵan balalar, tótenshe jaǵdaılardyń saldarynan shuǵyl kómekti talap etetin otbasylar jáne bilim berý uıymynyń alqaly organy aıqyndaıtyn bilim alýshylar men tárbıelenýshilerdiń ózge de sanattary jatady»,- dep habarlady qalalyq ákimdikten.
Alǵashqy eki jaǵdaıda ata-ana nemese zańdy ókil eGov nemese halyqty jumyspen qamtý ortalyǵy arqyly ótinish berýi qajet. Basqa jaǵdaılarda bilim berý uıymyna rastaıtyn qujattardy usyný kerek. Tizimder oqý jylynda bir-aq ret jasalady.
Joǵaryda atalǵan sanattarǵa kirmeıtin oqýshylar «Mektepke jol – shekarasyz jaqsylyq» respýblıkalyq aktsııasy aıasynda demeýshiler men metsenattar esebinen kómek ala alady. Aktsııa bıyl 1 tamyzda bastalyp, 30 qyrkúıekte aıaqtalady.
Búginde demeýshiler mektep formasynyń 4,5 myńnan astam jıyntyǵyn jáne mektep kerek-jaraqtary bar myńdaǵan rıýkzaktar satyp aldy. Qazirgi kezde aýdandyq bilim bólimderinde kómekke muqtaj adamdardyń tizimi jasalýda. «Mektepke jol – shekarasyz jaqsylyq» aktsııasy aıasynda mektep formasy men keńse kerek-jaraqtaryn alý úshin oqıtyn jeri boıynsha bilim berý uıymyna ótinish berý qajet.
