Almaty aq ulpaǵa orandy
ALMATY. QazAqparat - Almatylyqtar búgin naǵyz qys peızajynyń kýási boldy. Tańǵy 9-dan beri tolassyz qar jaýyp tur. Qalanyń taýly aımaǵynda túsken qar bıiktigi qazir 10-15 santımetrge jetip qaldy, dep habarlaıdy QazAqparat.
Kósheler, ǵımarattar, aǵashtar men kólikter qardan kórpe jamyldy.
Qalanyń mekemeleri shtattyq rejımde jumys jasap tur. Turǵyndar qalanyń ortalyǵynda janǵa jaıly aýa raıynda demalyp jatyr.
Sınoptıkterdiń boljaýynsha, qar qańtardyń 16-syna deıin álsin-álsin jaýyp turady.
Óz kezeginde qalanyń kommýnaldyq qyzmetteri tolassyz jaýǵan qardy tazalaýmen aınalysyp jatyr.
Almaty qalasy Tabıǵı resýrstar jáne tabıǵatty paıdalanýdy retteý basqarmasynyń habarlaýynsha, kók taıǵaqtyń aldyn alý maqsatynda kommýnaldyq qyzmetter qar jaýǵan kezden bastap joldarǵa tuz ben qum seýip, joldyń júretin bóligi men jaıaý adamdar júretin jerlerden qardy kúrep, tazalaýda. Bul jumystarǵa 190 qum shashqysh kólik tartyldy.
Búgin saǵat 14-00 deıin 1240 tonna muzǵa qarsy qospa materıal paıdalanylǵan.
Joldyń ústindegi qardy sypyryp tazalaý úshin 138 arnaıy tehnıkadan tizilgen 22 kolonna júrýde.
Búgin túnde de kommýnaldyq qyzmet ókilderi qar tazalaý jumystarymen aınalysatyn bolady.
Aýdandyq ákimdikterde jáne qalalyq ákimdikte qardy tazalaý jónindegi jumystardy baqylaý boıynsha táýlik boıy kezekshilik uıymdastyrylady.
