Almaty 9 jasar balanyń joǵalýyna qatysty mán-jaı aıtyldy
ALMATY. QazAqparat – Almaty polıtsııasy 9 jastaǵy Mesýt Myrzaqulovtyń joǵalýyna baılanysty tolyq málimetti jarııalady, dep habarlaıdy QazAqparat tilshisi.
Anyqtalǵandaı, polıtsııa balany óziniń burynǵy kórshisi ári dosynyń úıinen tapty. Ol dosymen oınap ketip, kesh bolǵan soń sol úıde qonyp qalǵan.
«Mesýt dosyna qonaqqa barǵan. Atasy men ájesine sol úıde ekenin aıtqan. Kesh bolyp ketkendikten sol úıge qonǵan. Balanyń isin shalalyq deýge de bolady. Biraq túnimen balany polıtsııa men kınologtar izdedi. Tańerteń izdeý sharalaryna muǵalimder men eriktiler qosyldy. Balanyń din aman tabylǵanyna qýanyshtymyz», - dedi qalalyq Polıtsııa departamenti basshysynyń birinshi orynbasary Nurlan Almasbekov.
Polıtsııa qyzmetkerleri balany anasyna tapsyrdy. Mesýttyń otbasynda ózinen keıin qaryndasy bar.
Esterińizge sala keteıik, balanyń joǵalǵany týraly búgin habarlaǵan bolatynbyz.
