Almaty 2023-2024 jyldarǵa ShYU-nyń mádenı jáne týrıstik astanasy boldy

ASTANA. QazAqparat – Shanhaı yntymaqtastyǵy uıymyna qatysýshy elder mınıstrleri 2023-2024 jyldarǵa uıymnyń mádenı jáne týrıstik astanasy retinde Almaty qalasyn bekitý usynysyn qoldady, dep habarlaıdy QazAqparat.

QR Mádenıet jáne sport mınıstrliginiń baspasóz qyzmetinen málim etkendeı, vedomstvo basshysynyń mindetin atqarýshy Ashat Oralov Shanhaı yntymaqtastyq uıymyna qatysýshy elderdiń mádenıet mınıstrleriniń keńesine qatysty. Onlaın-kezdesýge Úndistan, Qytaı, Qyrǵyzstan, Ózbekstan, Tájikstan, Reseı jáne Pákistan ókilderi de qatysty.

Ashat Oralov Almaty qalasyna ShYU-nyń 2023-2024 jyldarǵa mádenı jáne týrıstik astanasy mártebesin berý týraly máseleni kóterdi.

«Men Keın myrzaǵa jáne barlyq qatysýshylarǵa bizdiń bastamamyzdy qoldaǵany úshin alǵys aıtamyn. Búgingi tańda Almaty qalasynda 14 is-sharany kózdeıtin jospar ázirledik. Bul halyqaralyq týrıstik jáne mádenı festıvalder, sondaı-aq marafondar. Qazaqstannyń ShYU-ǵa tóraǵalyǵy da aýqymdy mádenı baǵdarlamamen súıemeldenetin bolady.

ShYU elderimen barlyq salada, onyń ishinde týrızm baǵyty boıynsha da yntymaqtastyqty damytý men nyǵaıtýdyń oń serpini baıqalady. Almatynyń mádenı jáne týrıstik astana retinde bekitilýi týrızm salasyndaǵy kórsetkishterdi jaqsarta túsedi.

Barshańyzdy Qazaqstanǵa kelip, elimizdiń kórikti jerlerimen jáne mádenıet salasyndaǵy jumysymyzdyń nátıjelerimen tanysýǵa shaqyramyn», - dedi Mádenıet jáne sport mınıstriniń mindetin atqarýshy.

Eske salaıyq, Qazaqstan 2023 jyldyń shildesinen 2024 jyldyń shildesine deıin Shanhaı yntymaqtastyǵy uıymyna tóraǵalyq etedi.