Almaty 2-JEO jańǵyrtý jobasyn qarjylandyrý týraly qujatqa qol qoıyldy

ALMATY. QazAqparat - Azııa Damý Banki (ADB) men «Samuryq-Energo» AQ qazaqstandyq elektr energetıkalyq holdıng qurylymyndaǵy «Almaty elektr stantsııalary» AQ (AlES) kompanııasy arasynda kredıttik kelisimge qol qoıyldy. Qujat «Almaty JEO-2-ni qorshaǵan ortaǵa áserdi barynsha azaıta otyryp jańǵyrtý» jobasyn qarjylandyrýdy kózdeıdi, joba boıynsha júrgizilgen jumystar búginde praktıkalyq iske asyrý kezeńine ótti, dep habarlaıdy QazAqparat tilshisi.

«Samuryq-Energo» AQ baspasóz qyzmetiniń málimetinshe, jalpy somasy 98 mlrd teńgeni quraıtyn qaryz shartyna «AlES» AQ basqarma tóraǵasy Erlan Kırkınbaev pen ADB-nyń Ońtústik, Ortalyq jáne Batys Azııadaǵy jeke sektordyń ınfraqurylymdyq jobalary jónindegi departamentiniń dırektory Shantaný Chakrabortı (Shantanu Chakraborty) qol qoıdy.

Almaty JEO-2 nysanyn ıelenetin «AlES» AQ úshin ADB atalǵan jobany iske asyrý sheńberinde kredıttik kelisim jasalǵan úshinshi qarjylyq seriktes.

Buryn Almaty qalasynda eski JEO-2 janyndaǵy alańda jańa gaz stantsııasynyń qurylysyn qarjylandyrý boıynsha tıisti sharttar Eýropalyq Qaıta Qurý jáne Damý bankimen (EQDB) jáne Qazaqstannyń Damý Bankimen (QDB) jasalǵan bolatyn.

AlES basshysy Erlan Kırkınbaevtyń aıtýynsha, ADB-men qaryz týraly kelisimge qol qoıý jobany qarjylandyrýmen baılanysty barlyq máselelerdi túpkilikti sheshetin bolady.

Stantsııa tolyǵymen tabıǵı gazǵa aýysyp, kómirdi otyn retinde paıdalanýdan bas tartatyn bolady.

Almaty JEO-2-ni jańǵyrtý jáne gaz otynyna aýystyrý jónindegi joba «Samuryq-Qazyna» Qory» AQ qoldaýymen iske asyrylýda. AlES pen ADB arasyndaǵy kredıttik kelisimge qol qoıý jónindegi is-shara sheńberinde «Samuryq-Qazyna» AQ men ADB arasynda kepildik shartyna qol qoıyldy.

Qor mamandarynyń aıtýynsha, qol qoıylǵan qujat táýekelderdi azaıtýǵa jáne jobany nesıeleý sharttaryn jaqsartýǵa yqpal etedi.

Іs-sharaǵa «Samuryq-Qazyna» AQ basqarma tóraǵasy Nurlan Jaqypov, ADB prezıdenti Masatsýgý Asakavaı (Masatsugu Asakawa) jáne «Samuryq-Energo» AQ basqarma tóraǵasy Serik Túıtebaev qatysty.