Almaty-2 vokzalynda ekinshi termınal salynbaq
ALMATY. Qazaqparat - «QTJ» AQ UK Almaty qalalyq Qoǵamdyq keńesiniń eskertpelerinen soń temir jol vokzaldaryn qaıta jańǵyrtý jumystaryn jyldamdatýdy qolǵa almaq, dep habarlaıdy QazAqparat tilshisi.
28-naýryzda qoǵamdyq keńes músheleri Almaty vokzaldaryn aralap, jaı-kúıin baqylaǵan bolatyn.
Monıtorıng barysynda vokzaldar qaıta jańǵyrtýdy talap etip otyrǵandyǵy anyqtalǵan.
Búgin QTJ vokzal sharýashylyǵy boıynsha atqarýshy dırektory Juban Kórpebaev Almaty vokzaldaryn jańǵyrtý jumystary qalaı ótetinin aıtty.
«Qazir tehnıkalyq jobaǵa ózgeris engizip jatyrmyz. Jobalaýshymen birige otyryp, jerasty jolynyń shyǵa berisin qosymsha eskalatorlar salý arqyly keńeıtý josparda bar. Almaty-1 vokzaly boıynsha ózgeristerdi eskere otyryp, jobalyq smetalyq qujattamany ázirleýdi bıyl jetloqsanda aıaqtaý oıda bar. Jeltoqsannan bastap qurylys-montaj jumystaryna kirisemiz. Qurylys jumystary keler jyly jeltoqsanda aıaqtalýy tıis», - dedi Juban Kórpebaev.
Onyń aıtýynsha, búginde Ulttyq kompanııa men Almaty ákimdigi arasynda qalanyń temir jol vokzaldaryn jóndeý jáne qalpyna keltirýdiń Jol kartasy qabyldanǵan.
«Almaty-1 vokzaly boıynsha ǵımarattyń qasbetin alǵa qaraı shyǵaryp, negizgi platformany keńeıtý kózdelgen. Búginde onda eki eskalator jumys istep tur. Ol búginde jolaýshylar aǵyny úshin tarlyq etip otyr. Al, Almaty-2 vokzalynyń ǵımaraty shaǵyn, syıymdylyǵy óte tómen. Sondyqtan, Jeltoqsan kóshesinde jańa termınal qurylysy josparlanǵan. Almaty-2 vokzaly boıynsha qurylys jumystary 2020 jyldyń ortasyna deıin jalǵaspaq", - dedi Juban Kórpebaev.
QTJ ókili syrtqy qatynasty Almaty-1 vokzalynan 2-Almatyǵa aýystyrý josparda baryn aıtty.
«Ekinshi joldy ashqan soń Talǵar, Qapshaǵaı qatynastaryn Almaty-2-ge kirgizýge bolady. Joba aıaqtalǵan soń qoǵamdyq tyńdaý ótkiziledi», - dedi QTJ ókili.
foto:railwayz.info
