«Almaty-1» temirjol vokzaly mańynda metro stansasy salynady
ALMATY. QazAqparat - «Metroproekt» JShS-niń jobalaýshy bas ınjeneri Pavel Moskovchýk Almatynyń Túrksib aýdanynda metropolıtendi damytý josparymen bólisti, dep habarlaıdy QazAqparat tilshisi.
«Túrksib aýdanynda metropolıtendi damytý mańyzdy oqıǵa. Biz búgin Túrksib aýdany baǵytyna qaraı birinshi metro jelisin júrgizý syzbasyn kórsetip otyrmyz. Qazirgi Raıymbek batyr stansasynan soltústik baǵytqa qaraı, qalanyń tómengi bóligine, Seıfýllın kóshesi boıymen sozýdy usynyp otyrmyz», - dedi Pavel Moskovchýk.
Onyń aıtýynsha, jospar boıynsha Túrksib aýdanynda Jansúgirov pen Seıfýllın kósheleriniń qıylysy, Seıfýllın boıymen Aqan serige burylyp, Jumabaev-Seıfýllın qıylysynda jáne «Lokomotıv» stadıony baǵytynda metro stansalary paıda bolady.
«Kelesi metropolıten stansasy Almaty-1 temirjoly aýdanynda bolady. Odan keıingi stansany biz Bekmahanov-Jansúgirov kósheleriniń qıylysynda salmaqpyz. Munymen toqtamaı, metro jelisi qalanyń tómengi baǵytyna qaraı túsip, Pervomaıka aýylyna jetedi. Onda «Soltústik avtovokzal» stansasyn salýdy josparladyq», - dedi ol.
Injenerdiń aıtýynsha, metro jelisi Qoıanqus Yntymaq aýyldaryna deıin uzarýy múmkin.
«Turaqty jáne jetkilikti qarjy bolsa, muny 5 jylda júzege asyrýǵa bolady», - dedi Pavel Moskovchýk.
