«Almaty–Taldyqorǵan» gaz qubyrynyń ekinshi jelisi salynady
ASTANA. KAZINFORM — Almaty jáne Jetisý oblystaryn qosymsha taýarlyq gaz kólemimen qamtamasyz etýge baǵyttalǵan «Almaty–Taldyqorǵan» magıstraldyq gaz qubyrynyń ekinshi jelisi jobasy iske asyrylýy múmkin.
Bul týraly QR Energetıka vıtse-mınıstri Qaıyrhan Tutqyshbaev málimdedi. Onyń aıtýynsha, atalǵan joba óńirlerdiń damýyna serpin beretin mańyzdy ınfraqurylymdyq jobalardyń biri.
— Almaty oblysy men Jetisý oblysynyń damýyna serpin beretin taýarlyq gazdyń qosymsha kólemimen qamtamasyz etýdegi taǵy bir mańyzdy joba — «Almaty–Taldyqorǵan» magıstraldyq gaz qubyrynyń ekinshi jelisin salý jobasy. Qazirgi ýaqytta joba memlekettik saraptamadan ótip jatyr. Saraptamanyń oń qorytyndysy alynǵannan keıin jobany qarjylandyrý máselesi qaralady, — dedi Qaıyrhan Tutqyshbaev.
Onyń aıtýynsha, el turǵyndaryn tabıǵı gazǵa tolyq qoljetimdilikpen qamtamasyz etý maqsatynda Energetıka mınıstrligi birqatar óńirdi gazdandyrý múmkindigin qarastyryp jatyr.
— Budan bólek el halqyn tabıǵı gazben qamtý úshin qazirgi kezde QR Energetıka mınıstrligi eldiń soltústik jáne shyǵys óńirlerin — Soltústik Qazaqstan oblysy, Pavlodar, Abaı jáne Shyǵys Qazaqstan oblystaryn gazdandyrý máselesin pysyqtaýda, — dedi Tutqyshbaev.
Mınıstrlik málimetinshe, atalǵan óńirlerdi gazdandyrý Qazaqstandaǵy tabıǵı gazǵa qoljetimdilikti keńeıtýge baǵyttalǵan.
Aıta keteıik, Qazaqstanda gaz tutynýǵa áleýmettik norma engizilýi múmkin.
