Almaty–Shanhaı reısi eki el týrızmin jaqyndastyrdy
ASTANA. KAZINFORM — Qazaqstan Qytaı týrısteri úshin tartymdy baǵytqa aınalyp keledi. 2026 jylǵy 29 naýryzda Almaty–Shanhaı tikeleı áýe reısiniń iske qosylýy eki el arasyndaǵy týrıstik yntymaqtastyqty jańa deńgeıge kóterip, kelýshiler sanynyń artýyna serpin bermek. Bul týraly «Kazakh Tourism» UK» AQ baspasóz qyzmeti málim etti.
Qazaqstan aspan asty elinen keletin saıahatshylar úshin tartymdy óńirge aınalyp, týrıster aǵyny jyl sanap artyp keledi. Máselen, 2024 jyly elimizge 655 myń Qytaı azamaty taban tirese, 2025 jyly bul kórsetkish 968 myńǵa jetip, 48 paıyzǵa jýyq ósim kórsetti.
2026 jylǵy 29 naýryzda Air Astana áýe kompanııasy Almaty — Shanhaı baǵyty boıynsha tikeleı qatynasty iske qosty. Bul — Qazaqstan men Azııanyń iri megapolısteriniń birin baılanystyratyn jańa áýe joly.
Ushaqtar aptasyna úsh márte — seısenbi, beısenbi jáne jeksenbi kúnderi qatynaıdy. Al Shanhaıdan Almatyǵa keri reıster dúısenbi, sársenbi jáne juma kúnderine josparlanǵan.
— Jańa baǵyttyń ashylýy eki el arasyndaǵy týrıstik áriptestikti nyǵaıtýdyń mańyzdy qadamy boldy. 1 sáýir kúni Shanhaıdan Almatyǵa Qytaıdyń 8 iri týroperatory ushyp keldi. Olar «Kazakh Tourism» UK» AQ men Air Astana birlesip uıymdastyrǵan tanysý týry aıasynda elimizdiń basty týrıstik nysandary men saıahat múmkindikterin óz kózimen tamashalaı alady, — delingen habarlamada.
Sapar barysynda meımandar «Shymbulaq» taý shańǵysy kýrortyna, Kólsaı men Sharynǵa baryp, óńirdiń ózge de biregeı tabıǵı ári mádenı oryndaryn aralaıdy.
Sonymen qatar, sapar aıasynda Qazaqstannyń týrıstik bıznes ókilderimen B2B kezdesýler ótkizilmek. Bul shara jańa iskerlik baılanystar ornatýǵa jáne eki eldiń týroperatorlary arasyndaǵy yntymaqtastyqty keńeıtýge jol ashady.
Aıta keteıik, týrızm salasyna salynǵan ınvestıtsııa kólemi 33% artty.