Almaty–Óskemen tasjolynda bolǵan jol apatynan 11 adam zardap shekti
ASTANA. KAZINFORM — Almaty–Óskemen tasjolynda jol-kólik oqıǵasy boldy. Polıtsııa málimetinshe, Foton jáne Mercedes-Benz Sprinter kólikteri soqtyǵysqan, dep habarlaıdy Kazinform agenttiginiń tilshisi.
Tártip saqshylarynyń aıtýynsha, Foton júrgizýshisi ekinshi jolaqtan keri burylý kezinde manevrdiń qaýipsiz ekenine kóz jetkizbeı, shaǵyn avtobýspen soqtyǵysqan.
Oqıǵa saldaryn kýágerler vıdeoǵa túsirgen. Kadrlardan soqqy kóliktiń búıir tusyna tıgeni kórinedi, sonyń saldarynan esikter qysylyp qalǵan. Keıbir zardap shekkenderdi kólikten arnaıy quraldardyń kómegimen alyp shyǵýǵa týra kelgen.
Oqıǵa ornyna TJD qutqarýshylary kelip, arnaıy jabdyqtar arqyly adamdardy bosatqan.
Jalpy 11 adam aýrýhanaǵa jetkizildi.
— Atalǵan fakti boıynsha qylmystyq is qozǵaldy, tergeý amaldary júrgizilýde, barlyq mán-jaı anyqtalyp jatyr, — dep habarlady polıtsııa.
Osydan buryn Qostanaı oblysynda jol apatynan 4 adam qaza tapqanyn jazǵan bolatynbyz.
