Almatynyń jedel járdem avtoparki 37%-ǵa jańartyldy

ALMATY. KAZINFORM – 2024 jyly densaýlyq saqtaý salasyn qarjylandyrý 25%-ǵa ulǵaıdy. Bul rette densaýlyq saqtaý ınfraqurylymyn jańǵyrtýǵa erekshe nazar aýdaryldy.

Erbolat Dosaevtyń sózinshe, bıyl Almaty qalasynyń máslıhaty alǵashqy medıtsınalyq-sanıtarlyq kómektiń biryńǵaı standartyn bekitti. Soǵan sáıkes 4 alǵashqy medıtsınalyq-sanıtarııalyq kómek ortalyǵy men 1 emhana salyndy. Budan bólek, 32 nysandy salýǵa jáne jańǵyrtýǵa jobalaý-smetalyq qujattama ázirlenip jatyr.

– Osy jyldyń tamyz aıynda Qazaqstanda alǵash ret balalar arasynda múgedektikti tómendetý úshin erte aralasý ortalyǵy quryldy. Sondaı-aq, 2024 jyly qalalyq Balalar shuǵyl medıtsınalyq kómek ortalyǵy ashyldy. Medıtsınalyq qyzmetterdiń sapasyn arttyrý – áleýmettik turaqtylyqtyń kepili. Osy jyldyń maýsym aıynda Qazaqstanda alǵash ret «Uryq hırýrgııasy» pılottyq jobasy engizildi. Endi Almatyda jylyna 150-ge deıin jatyrishilik ota jasaýǵa bolady,– deıdi ákim.

Aıtýynsha, bıyl 3 753 patsıent 45 nozologııa boıynsha 9,2 mlrd teńgege orfandyq preparattarmen qamtamasyz etildi, qarjylandyrý ótken jylmen salystyrǵanda 10%-ǵa ósti.

– Eki jyl ishinde jedel medıtsınalyq járdem avtoparki 37%-ǵa jańartyldy. 2023 jyly 55 mashına, 2024 jyly 48 mashına satyp alyndy. Densaýlyq saqtaý salasyndaǵy tańdalǵan kýrstyń durystyǵyn bıylǵy 11 aıdyń qorytyndylary rastaıdy, ol boıynsha ana ólimi 48,2%-ǵa, náreste ólimi 5,4%-ǵa, qaterli isikterden bolatyn ólim 16%-ǵa tómendedi,– dep atap ótti Erbolat Dosaev.