Almatynyń jaıaý júrginshiler ótkelinde zamanaýı jaryqtandyrý engizildi
ALMATY. KAZINFORM – Tilendıev kóshesiniń batysyna qaraı Sátbaev kóshesiniń boıyndaǵy jaıaý júrginshiler ótkelinde jańa proektsııalyq jaryqtandyrý ornatyldy.
Jol qozǵalysyn uıymdastyrý jáne jolaýshylar kóligi basqarmasynyń málimetinshe, atalǵan aýmaq qarqyndy jol qozǵalysyna baılanysty tańdalǵan. Bul mańda turǵyn úı keshenderi, qoǵamdyq kólik aıaldamalary men saýda nysandary ornalasqan - kólik te, adam da kóp.
Jańa jaryqtandyrý ótkeldiń shekarasyn aıqyn kórsetip, ásirese qarańǵy ýaqytta jaıaý júrginshilerdi erterek baıqaýǵa múmkindik beredi. Bul jol-kólik oqıǵalarynyń aldyn alýǵa jáne qaýipsizdikti arttyrýǵa yqpal etpek.
- Júıe avtonomdy túrde jumys isteıdi jáne kóshe jaryqtandyrýymen biriktirilgen. Sonyń arqasynda ol turaqty ári qosymsha shyǵynsyz tıimdi qyzmet etedi. Almatyda jol qozǵalysy qaýipsizdigin arttyrýǵa baǵyttalǵan osyndaı zamanaýı sheshimderdi engizý jalǵasyp keledi, - dep habarlady vedomstvo ókilderi.
Eger joba oń nátıje kórsetse, bul tájirıbe basqa aýdandarda da qoldanylady.
Eske salaıyq, buǵan deıin Almaty qalasynyń ákimi Darhan Satybaldy jol qaýipsizdigin kúsheıtýdi tapsyrǵan.
