Almatynyń jańartylǵan Bas josparynyń jobasy Májilis depýtattaryna tanystyryldy
ALMATY. KAZINFORM - Almaty qalasynyń ákimdigi shahardyń qala qurylysy keńesi músheleri Qazaqstan Parlamenti Májilisiniń depýtattaryna qalanyń 2040 jylǵa deıingi Bas josparyn túzetý jobasyn tanystyrdy.
Jańartylǵan qujattyń negizgi baǵyttaryn talqylaýǵa depýtattar Erlan Stambekov, Baqytjan Bazarbek jáne Irına Smırnova qatysty.
Kezdesý barysynda Almaty qalasy ákiminiń orynbasary Beıbit Shahanov halyq qalaýlylarynyń suraqtaryna jaýap berip, qalanyń polıtsentrlik úlgi boıynsha damıtynyn atap ótti.
Bul tásil jańa iskerlik aımaqtardy damytýǵa baǵyttalǵan. Onda jumys oryndary, qoǵamdyq keńistikter men zamanaýı ınfraqurylym paıda bolady.
Óz kezeginde Parlament depýtattary qalanyń Bas josparyn túzetý der kezinde qolǵa alynǵanyn aıtty. Óıtkeni qala halqynyń jedel ósimi, qurylys qarqyny men ekologııalyq júktemeniń artýy jańa sheshimderdi talap etedi.
Baqytjan Bazarbek qujatta seısmıkalyq qaýipsizdik jaıyna erekshe kóńil bólingenin aıtty. Sonymen qatar, Almatynyń Bas josparyna tikeleı áser etetin birqatar mańyzdy ózgeris QR jańa Qurylys kodeksi jobasyna engizilgenin jetkizdi.
– Biz qujatqa seısmıkalyq qaýip pen seısmıkalyq táýekel sııaqty mańyzdy uǵymdardy engizdik, sondaı-aq aýdandardy mindetti túrde tólqujattaý qarastyryldy. Seısmıkalyq qaýip deńgeıin aýdan-aýdanǵa bólip anyqtaý men kóshkin qaýpi bar aýmaqtar kartalaryn Bas jospar men egjeı-tegjeıli josparlaý jobalaryn ázirleý kezinde mindetti túrde eskerý qajet. Bul talaptar bastapqy derekterdi berý men eskızdik jobalardy kelisýden bastap jobalyq-smetalyq qujattamany qaraýǵa deıingi barlyq kezeńde qoldanylýy qajet. Jalpy alǵanda, bul túzetý qalanyń damýyna qatysty negizgi máselelerge jaýap beredi, sondyqtan men usynylǵan ózgeristerdi qoldaımyn, – dedi B.Bazarbek.
Depýtat Irına Smırnova Bas jospardy túzetý kezinde qala turǵyndarynyń áleýmettik qamtylýy basty basymdyq bolýy kerektigin aıtty.
– Qalany damytý núkteli emes, keshendi qurylys arqyly júzege asýǵa tıis. ıAǵnı, adamdardyń múddesin eskerip, mektepterge, balabaqshalarǵa, medıtsına jáne áleýmettik nysandarǵa qoljetimdilikti qamtamasyz etý qajet. Jalpy, biz Bas jospardy túzetý jobasyn qoldaımyz, ol qalanyń teńgerimdi damýyna jol ashady dep senemiz, – dedi I.Smırnova.
Depýtat Erlan Stambekov qoǵamdyq kólik júıesin damytý jaıyna, sonyń ishinde LRT, BRT jáne metro jobalaryn iske asyrý múmkindikterine nazar aýdardy.
Depýtat E.Stambekovtiń aıtýynsha, turǵyndardy eń aldymen ekologııalyq júktemeni azaıtý, atap aıtqanda aýa sapasyn jaqsartý, jańa jasyl aımaqtar qurý jáne óndiristik nysandardy turǵyn úı aýmaǵynan tys aýmaqqa kóshirý jaıy alańdatady.
Eske salaıyq, qazirgi ýaqytta qalanyń Bas josparyna 2040 jylǵa deıingi túzetýler engizý jumystary júrgizilip jatyr. Joba kólik ınfraqurylymyn damytý, qalanyń polıtsentrlik qurylymyn qalyptastyrý, qoǵamdyq keńistikterdi keńeıtý, jasyl beldeýdi saqtaý jáne taýly aımaqtarda qurylys salýǵa tyıym salý syndy baǵyttardy qamtıdy.
Túzetýdegi mańyzdy baǵyttardyń biri – qoǵamdyq kólikti damytý. Metro jelilerin jedeldetip salý, LRT jáne BRT júıelerin engizý, sondaı-aq arnaıy jolaqtardy keńeıtý arqyly jolǵa túsetin júktemeni azaıtý kózdelip otyr.
Túzetý jobasynda halyqqa ortaq jasyl aımaqtarǵa basymdyq berilgen. 2040 jylǵa deıin olardyń aýmaǵy úsh esege ulǵaıyp, 3800 gektarǵa jetpek.
