Almatynyń jańadan taǵaıyndalǵan bas polıtseıi málimdeme jasady

ALMATY. KAZINFORM —  Almaty polıtsııa departamentiniń jańadan taǵaıyndalǵan bastyǵy Aıdyn Qabduldınov qyzmetine kirisip, alǵashqy málimdemesin jasady.

Ol Almatynyń ózi úshin beıtanys qala emes ekenin aıtty. Onyń sózinshe, Almaty — onyń kásibı turǵyda qalyptasyp, qyzmet jolynyń mańyzdy kezeńderi ótken qala.

— Bul megapolıs árdaıym ashyqtyǵymen, belsendi azamattyq ustanymymen jáne ádildikke degen talaby joǵary turǵyndarymen erekshelenedi. Almatylyqtar — beıjaı qaramaıtyn, suraı biletin ári birge jumys isteýge daıyn halyq, — dedi ol.

Jańa basshy aldyńǵy basshylyq pen jeke quramǵa atqarǵan eńbegi úshin alǵys aıtyp, qoǵamdyq tártip salasyndaǵy qazirgi nátıjeler sol júıeli jumystyń jemisi ekenin jetkizdi. Onyń aıtýynsha, negizgi mindet — bar jaqsyny saqtap, tıimdi baǵyttardy kúsheıtý.

Aıdyn Qabduldınovtyń sózinshe, qylmysqa qarsy kúreste tek jaýap berýmen shektelmeı, aldyn alý, túsindirý, halyqpen tikeleı jumys isteýge basymdyq beriledi.

— Qaýipsizdik dıalogsyz bolmaıdy. Polıtsııa, turǵyndar, jýrnalıster men qoǵam bárimizdiń maqsatymyz ortaq: tynysh, qaýipsiz ári senimdi qala, — dedi ol.

Jańa taǵaıyndalǵan bas polıtseı ashyq jumysqa, ózara senimge jáne birlesken áreketke daıyn ekenin málimdedi.

Eske salaıyq, 2026 jylǵy 9 qańtarda Almaty polıtsııa departamentiniń jańa basshysy bolyp polıtsııa general-maıory Aıdyn Qabduldınov taǵaıyndaldy. Ol munyń aldynda Soltústik Qazaqstan oblysy polıtsııa departamentiniń basshysy qyzmetin atqarǵan.