Almatynyń jańa ákimi josparymen bólisti
ALMATY. KAZINFORM – Búgin Memleket basshyǵynyń Jarlyǵymen Darhan Satybaldy Almaty qalasynyń ákimi bolyp taǵaıyndaldy.
Premer-mınıstr Oljas Bektenov pen Prezıdent Ákimshiliginiń basshysy Aıbek Dádebaı qatysqan Almaty máslıhaty jınalysynda jańa ákim Almatynyń basty máselelerin atap ótti.
– Almaty – bul elimizdiń iri megapolısi ǵana emes, sonymen qatar mádenı, ekonomıkalyq, ǵylymı jáne bilim berý ortalyǵy. Bul baı tarıhy bar, rýhy erekshe jáne úlken múmkindikter qalasy. Sondaı-aq qalamyzda birqatar syn-qaterler bar. Bul, eń aldymen, ekologııalyq problemalar, kólik júktemesi, sapaly jáne turaqty sýmen jabdyqtaý máseleleri, ınjenerlik jelilerdiń tozýy, tyǵyz qurylys. Bizdiń aldymyzda qalanyń odan ári turaqty damýy jáne árbir almatylyqtyń ómir súrý sapasyna baılanysty mindetter tur, - dedi ol.
Almaty qalasynyń jańa ákimi kelesi baǵyttarǵa basymdyq beretinin atap ótti:
1. Kólik júıesin damytý jáne ekologııany jaqsartý
Onyń aıtýynsha, qoǵamdyq kólikti damytý ákimdik qyzmetiniń basym baǵyttarynyń biri bolyp qala beredi. Kúndelikti kólik keptelisi, joldardyń shamadan tys júktelýi, atmosferalyq aýanyń lastanýy syndy máselelerdi sheshý úshin zamanaýı jáne ekologııalyq avtobýstardy satyp alý, avtobýs jáne trolleıbýs jelilerin keńeıtý, marshrýttardy ońtaılandyrý jáne qozǵalys aralyqtaryn qysqartý qamtamasyz etiletin bolady.
– Metropolıten qurylysy qarqyndy júrgizilip, BRT jelileri keńeıtiledi.
Almaty ekologııalyq turaqty megapolıske aınalýy tıis. Ol úshin sapaly kógaldandyrý, qoǵamdyq keńistikterdi damytý, qoqystardy bólek jınaý jáne kádege jaratý, energııa tıimdiligi jáne tabıǵı resýrstardy utymdy paıdalaný jónindegi bastamany qoldaý, elektromobılder men ekologııalyq taza tehnologııalarǵa kóshý úshin yntalandyrýdy engizý qamtamasyz etiledi, - dedi ákim.
2. Turǵyndardyń jaılylyǵy men qaýipsizdigi
Darhan Satybaldy sýmen qamtý, jylýmen jabdyqtaý, elektrmen qamtamasyz etý jelilerin júıeli túre jańartylatynyn atap ótti. Odan bólek aıtýynsha, turǵyn úı qory men qoǵamdyq ǵımarattardyń seısmıkalyq qaýipsizdigine erekshe kóńil bólinedi.
– Aýdandardy abattandyrý, aýlalardy, kóshe jaryǵyn, trotýarlardy, halyqtyń júrip-turýy qıyn toptary úshin qoljetimdi ortany qurý – munyń bári jáı ǵana ýáde emes, naqty merzimderi men nátıjeleri bar jospar bolady, - dedi ol.
3. Ekonomıkanyń turaqty damýy jáne kásipkerlikti qoldaý
– Almaty – bastamashyl jáne tapqyr adamdardyń qalasy. Biz shaǵyn jáne orta bızneske jańa qarjy quraldary, jeńildetilgen ákimshilik rásimder jáne ındýstrııalyq aımaqtardy damytý arqyly qoldaý kórsetemiz, - dep ýáde etti ákim.
Darhan Satybaldy qala IT-salany, startaptardy, kreatıvti ındýstrııalardy, týrıstik jáne bilim berý qyzmetterin damytý alańyna aınalatynyn aıtty.
4. Qoljetimdi jáne sapaly bilim berý, densaýlyq saqtaý jáne áleýmettik qorǵaý
Almaty ákimi belsendi damyp kele jatqan aýdandarda jańa mektepter men balabaqshalar salýǵa, jumys istep turǵan oqý oryndaryn jańǵyrtyp, tsıfrlyq bilim berý tehnologııalaryn engizýge ýáde berdi.
Aıtýynsha, densaýlyq saqtaý júıesi - emhanalardy jańartý, shalǵaıdaǵy shaǵyn aýdandarda jańa medıtsınalyq pýnktter salý, qyzmetterdi tsıfrlandyrý jáne salalyq mamandarǵa qoljetimdilik arqyly kúsheıtiletin bolady. Al Halyqtyń osal toptary – kópbalaly, qart, múgedektigi bar adamdardy áleýmettik qoldaýǵa erekshe nazar aýdarylady.
5. Almaty – jastar qalasy
– Almaty – bilim alýdy, damýdy, jasampazdyqty, eldi ózgertýdi qalaıtyndar úshin tartylys núktesi. Jastardy, olardyń bastamalaryn qoldaý, bilim alý, bıznesti bastaý, shyǵarmashylyq jobalardy iske asyrý úshin ınfraqurylymdy damytý — meniń jumysymnyń negizgi basymdyqtarynyń biri bolady, - dedi qala ákimi.
6. Ashyqtyq, dıalog jáne esep berý
Darhan Satybaldy aldyn ala daıyndalǵan marshrýttarǵa emes, aýlalarǵa, mektepterge, bazarlar men kóshelerge, ıaǵnı shynaıy Almatyǵa únemi shyǵyp turatynyn atap ótti.
– Basqarýdaǵy meniń basty qaǵıdattarymnyń biri - jergilikti atqarýshy organdardyń ashyqtyǵy jáne turǵyndarmen turaqty dıalog júrgizý bolady. Qarqyndy damyp kele jatqan megapolıste tek keri baılanys, azamattardyń senimi men qoldaýy arqyly turaqty jáne ádil qalalyq saıasat qurýǵa bolady, - dedi ol.
Eske salaıyq, búgin Memleket basshysynyń Jarlyǵymen Erbolat Dosaev Almaty qalasynyń ákimi qyzmetinen ketti.