Almatynyń jańa ákimi qala turǵyndaryna úndeý jasady

ALMATY. KAZINFORM — Darhan Satybaldy Instagram jelisindegi paraqshasynda almatylyqtardy birigip jumys isteýge shaqyrdy.

Ol Almaty qalasynyń ákimi retindegi alǵashqy jumys kúni Memleket basshysynyń qabyldaýynan bastalǵanyn atap ótti.

— Prezıdent Qasym-Jomart Kemeluly qalamyzdyń bolashaǵyna qatysty birqatar mańyzdy tapsyrma júktedi. Turaqty ekonomıkalyq ósimge qol jetkizý, qalanyń ınfraqurylymyn keshendi jańǵyrtý, jol-kólik júıesin jaqsartý, ekologııalyq máselelerdi sheshý men ekonomıkany ártaraptandyrý — aldaǵy jumysymyzdyń basty baǵyttary bolmaq, — dep jazdy ol.

Sonymen qatar qala ákimi ózi aıtqan basym baǵyttardy kezeń-kezeńimen júıeli túrde júzege asyratynyn aıtty.

— Almaty — arman men múmkindikter mekeni. Bul shaharǵa shynaıy janashyrlyqpen, tyń serpinmen, naqty ispen qyzmet etý — men úshin úlken mártebe. Bir jaǵadan bas, bir jeńnen qol shyǵaryp, birigip, tize qosyp eńbek etsek, arý qalamyzdy odan ári kórkeıte alamyz. Ásem Almatynyń árbir kóshesi men ár turǵyny úshin naqty ózgerister jasaý, aıanbaı qyzmet etý — bizdiń basty mindetimiz, — delingen ákim jazbasynda.

Eske salaıyq, Darhan Satybaldy Almaty qalasynyń ákimi bolyp taǵaıyndaldy.

Keıin Almatynyń jańa ákimi josparymen bólisti.