Almatynyń Túrksib aýdanynda 1960 jylǵa deıin salynǵan 586 úı bar
ALMATY. KAZINFORM – Almatydaǵy tozyǵy jetken turǵyn úı qorynyń basym bóligi Túrksib aýdanynda ornalasqan.
Almaty ákimi Erbolat Dosaev Túrksib aýdanynyń turǵyndarymen kezdesý barysynda aýdanda 1960 jylǵa deıin salynǵan 586 úı qaıta renovatsııalaýǵa jatatynyn aıtty.
«Jaıly qalalyq orta qurý ákimdik jumysynyń basty baǵyttarynyń biri. 2030 jylǵa deıin turǵyn úıdi renovatsııalaýdyń jańa baǵdarlamasy ázirlendi, onda keshendi jáne toqsandyq qurylys aıqyndaldy, eski turǵyn úı ıeleriniń kepildikteri jáne áleýmettik, ınjenerlik jáne kólik ınfraqurylymdaryn damytýdy eskere otyryp, turǵyn úı qoryn jańartý bekitildi», - dedi Erbolat Dosaev.
Aıtýynsha, qalada eski turǵyn úı eń ózekti máselelerdiń biri bolyp qala beredi.
«2024 jyldyń shildesinde Kassına kóshesindegi 6 jańa úıdiń qurylysy aıaqtalyp, turǵyndar qonystandy. Jyl sońyna deıin Saýranbaev kóshesindegi taǵy 7 jańa úıdi qoldanysqa berý josparda. Sondaı-aq, Altaı-2 shaǵyn aýdanynda jekemenshik qurylys salýshy 54 úıdiń ishinen 6 úı satyp aldy. Búgingi tańda eki toǵyz qabatty úıdi buzý jáne salý jumystary júrgizilýde»,- dedi qala ákimi.
Buǵan deıin, 2021-2025 jyldarǵa arnalǵan turǵyn úı qoryn jańartý baǵdarlamasy aıasynda Almatyda 708 eski úı buzylyp, 683 turǵyn úı salynatyny týraly jazǵan bolatynbyz.
