Almatynyń Túrksib aýdany ákimi taǵaıyndaldy
ALMATY. KAZINFORM — Almaty máslıhatynyń sessııasynda kadrlyq másele qaraldy. Prezıdent Ákimshiliginiń kelisimimen Almaty ákimi Túrksib aýdanynyń ákimi qyzmetine Damır Ákejanovtyń kandıdatýrasyn usyndy. Buǵan deıin ol Almaty qalasy ákimi apparaty basshysynyń orynbasary laýazymyn atqarǵan.
Qala ákimi Darhan Satybaldy kandıdatty tanystyryp, onyń kásibı tájirıbesine jáne qalanyń tynys-tirshiligin jaqsy biletinine toqtaldy.
— Damır Ákejanovtyń memlekettik basqarý júıesinde tájirıbesi mol, qalanyń ózekti túıtkilderin jaqsy biledi jáne men júktegen mindetterdi oryndaýǵa qajetti kásibı daıarlyǵy bar, — dedi qala basshysy.
Talqylaý qorytyndysy boıynsha máslıhat depýtattary usynylǵan kandıdatýrany qoldady.
Damır Ákejanov 2002 jyly ál-Farabı atyndaǵy qazaq ulttyq ýnıversıtetin «halyqaralyq quqyq» mamandyǵy, al 2008 jyly «qarjy» mamandyǵy boıynsha támamdaǵan.
Eńbek jolyn 2002 jyly syrtqy ekonomıkalyq baılanystar salasynda bastaǵan. Ár jyldary Almaty ákimdiginiń qurylymdarynda, sonyń ishinde kásipkerlik, ónerkásip jáne ınvestıtsııa máselesine jetekshilik etetin departamentter men basqarmalarda, sondaı-aq aýdan ákimderiniń apparattarynda jumys istegen. Basshylyq qyzmetter atqaryp, Jetisý aýdany ákiminiń orynbasary bolǵan.
Jańa qyzmetke taǵaıyndalǵanǵa deıin Almaty ákimi apparaty basshysynyń orynbasary laýazymyn atqarǵan.
Memlekettik qyzmettegi jalpy eńbek ótili 16 jyldan asady.
Eske salaıyq, buǵan deıin Almaty oblysynyń Mádenıet basqarmasyna jańa basshysy taǵaıyndalǵanyn habarlaǵanbyz.