Almatynyń týrıstik nysandaryna 3D-týr jasaýǵa bolady
Almaty Tourism bıýrosy qalanyń kórikti nysandary boıynsha tegin vırtýaldy 3D-týrlar ázirledi. Joǵary sapadaǵy sandyq kóshirmelerdiń arqasynda úıde otyryp-aq týrıstik nysandarǵa barýǵa bolady, dep habarlaıdy Kazinform.
Vırtýaldy týr Almatyny halyqaralyq deńgeıdegi týrıstik aımaq retinde tanytýdy kózdeıdi.
«Bastapqyda ınteraktıvti ekskýrsııa jasaǵymyz keldi, sol sebepti tintýirdiń kómegimen tolyq saıahat jasaı alasyz. Kez kelgen adam úıden shyqpaı-aq kórikti nysandar boıynsha barynsha aqparat ala alady. Mysaly, tintiýirdi Áýezov atyndaǵy Qazaq Ulttyq drama teatrynyń sahnasyna aparyp, onda buryn qandaı qoıylymdar bolǵanyn bilýge bolady. Mundaı vırtýaldy týrlar tek aqparat berip qana qoımaı, sonymen qatar ekskýrsııalyq-týrıstik nysandarmen tolyq tanysýǵa múmkindik beredi», – dep atap ótti Almaty Tourism Bureau basshysy Kamıla Lukpanova.
Qazirdiń ózinde tórt 3D týr quryldy, olardy VisitAlmaty.kz. saıtynan kórýge bolady.
Qoljetimdi týrlardyń ishinde D.A. Qonaev memorıaldyq páter-mýzeıi, qazaqtyń uly jazýshysy M. Áýezovtiń ádebı-memorıaldyq úı-mýzeıi , sondaı-aq Abaı QazUOBT jáne Áýezov atyndaǵy Qazaq ulttyq drama teatry bar.
Vırtýaldy saıahatty bastaý úshin tek bir qadam jasaý jetkilikti – kire beris esikti basyp, ǵımarattyń ishine kiresiz. Tintýirdi jyljytý arqyly jan-jaqqa qarap, ár bóligin zertteı otyryp, dálizder arqyly alǵa jyljı alasyz. Árbir orynnyń atmosferasyna tolyq ený úshin qazaq, orys jáne aǵylshyn tilderinde qoljetimdi aýdıogıdti qosýǵa bolady.
Bıylǵy qarasha aıynda týrısterge Almatynyń taǵy toǵyz nysany boıynsha, onyń ishinde QR ortalyq memlekettik mýzeıi, Respýblıka Saraıy, Qasteev atyndaǵy memlekettik óner mýzeıi, Yqylas atyndaǵy ulttyq mýzykalyq aspaptar mýzeıi, Almaty metropolıteni, Lermontov atyndaǵy Memlekettik akademııalyq orys drama teatry, Ortalyq meshit, Almaty Voznesensk kafedraldy sobory jáne Baıken meshiti boıynsha vırtýaldy saıahat qoljetimdi bolady.
