Almatynyń tsıfrlyq syńary: 5 jyldan beri talqylanyp kele jatqan joba qandaı satyda
ALMATY. KAZINFORM – Almatyda qalanyń tsıfrlyq syńaryn ázirleý jumysy birneshe jyldan beri talqylanyp keledi.
Almaty qalasynyń tsıfrlyq syńaryn jasaý bastamasy alǵash ret 2021 jyly aıtyldy. Ol kólik, ónerkásip, energetıka, ǵımarattar, sýdy tutyný men sýdy burý, jerdi paıdalaný sııaqty megapolıstiń damý sektorlaryn qamtıtyny habarlandy.
2022-2024 jyldar aralyǵynda atalǵan joba Sıngapýr jáne Shanhaı sııaqty megapolısterdiń tsıfrlyq sheshimderine uqsas jasalatyny aıtylyp, ol josparlaý satysynda boldy.
Byltyr Almatynyń tsıfrlandyrý basqarmasy Qytaıdyń Shenchjen qalasyndaǵy SUTPC kompanııasymen birlesip júzege asyrý kózdelgen pılottyq joba boıynsha tehnıkalyq tapsyrma ázirlenip jatqanyn habarlady. Vedomstvo jobany qarjylandyrý Qytaıdyń halyqaralyq damý jónindegi yntymaqtastyq agenttiginiń (China International Development Cooperation Agency) grant qarajaty esebinen josparlanǵanyn atap ótti.
2026 jyldyń basynda Almatynyń «Jas Qanat» shaǵynaýdany pılottyq kezeńde tsıfrlyq kóshirmesi jasalatyn aýmaq retinde belgilengeni belgili boldy.
Kazinform agenttigi jaýapty basqarmaǵa qaıta júginip, megapolıstiń tsıfrlyq syńaryn ázirleý boıynsha jumys qanshalyqty alǵa jyljyǵanyn surady. Oǵan jaýap bergen tsıfrlandyrý basqarmasynyń ókilderi qazir joba áli de pysyqtaý satysynda ekenin aıtty.
Vedomstvo jaýabyna sáıkes, birinshi kezeńde qalalyq ınfraqurylym men ınjenerlik jelilerdi tolyq túgendeý jumystaryn júrgizý josparlanyp otyr. Atalǵan jumystardyń qorytyndysy boıynsha alynǵan málimetter júıelendirilip, tsıfrlyq formatqa kóshiriledi.
Odan keıingi kezeńde qalanyń tsıfrlyq egiziniń negizi bolatyn aýqymdy aqparattyq júıeni ázirleý kózdelgen. Bul júıe qalalyq derekter men ınfraqurylymdy keshendi basqarýǵa múmkindik bermek.
- Qalanyń tsıfrlyq syńary qalalyq derekter men ınfraqurylymdy biryńǵaı tsıfrlyq júıege biriktirýge, qalany basqarý tıimdiligin arttyrýǵa, qalalyq josparlaý men boljaý protsesterin jetildirýge, sondaı-aq qaladaǵy máselelerdi jedel anyqtap, olardy sheshýge múmkindik beredi, - delingen tsıfrlandyrý basqarmasynyń jaýabynda.
Eske salaıyq, bıyl 28 qazandaǵy Joldaýynda Prezıdent Qasym-Jomart Toqaev qala resýrsyn tıimdi basqarý úshin Úkimetke ákimdiktermen birge qala ınfraqurylymynyń tsıfrlyq syńaryn ázirleýdi tapsyrdy.
