Almatynyń tsıfrlyq egizi jasala ma – ákimdik jaýap berdi

ALMATY. KAZINFORM – Digital Almaty 2023 halyqaralyq tsıfrlyq forým barysynda Almatynyń tsıfrlyq egizi jaqyn bolashaqta jasalatynyn habarlaǵan bolatyn. Osy oraıda, Almaty qalasynyń Tsıfrlandyrý basqarmasynan shahardyń elektrondy nusqasyn daıyndaý qandaı satyda ekenin suradyq.

Tsıfrlandyrý basqarmasynyń baspasóz qyzmeti megapolıstiń tsıfrlyq kóshirmesin jasaý – ázirge tek tujyrymdama kúıinde ekenin málimdedi.

- Búgingi tańda «Almaty qalasynyń tsıfrlyq egizi» jobasy tujyrymdamany ázirleý jáne tehnıkalyq erekshelikti qalyptastyrý satysynda tur. «Almaty qalasynyń tsıfrlyq kóshirmesin» qurý maqsaty – ártúrli júıeler men derekterdi ıntegratsııalaý arqyly qalalyq ınfraqurylymdy basqarýdy jaqsartýǵa baǵyttalǵan. Bul qalalyq ortadaǵy ózgeristerdi modeldeýge jáne boljaýǵa múmkindik beredi. Bul neǵurlym negizdelgen sheshimder qabyldaýǵa yqpal etedi, – dep habarlady basqarmadan.

Eske salaıyq, Almaty qalasynyń ákimi Erbolat Dosaev qalany damytý baǵdarlamasynyń «Almaty – Smart-sıtı» baǵyty aıasynda megapolıstiń tsıfrlyq egizin jasaý josparlanǵanyn aıtqan.

«Qabyldanǵan qalany damytý baǵdarlamasyndaǵy 7 negizgi basymdyqtyń biri «Almaty – Smart-sıtı» qurý. Sıngapýr jáne Shanhaı sııaqty megapolısterge uqsas qalanyń «tsıfrlyq egizin» qurýdy bastaý josparda. Byltyr qyrkúıek aıynda Almaty Almaty Data Lake-biryńǵaı derekter qoımasy jobasymen IEEE Smart Cities Awards Contest halyqaralyq «aqyldy qalalar» baıqaýynyń fınalısi atandy», – dedi qala basshysy. 

Aıta keteıik, tsıfrlyq egiz – bul fızıkalyq obektiniń sandyq kóshirmesi nemese kórinisi. Tsıfrlyq egiz tujyrymdamasyn alǵash ret 2012 jyly Mıchıgan ýnıversıtetinde doktor Maıkl Grıvz tanystyrǵan.