Almatynyń tsıfrlyq egizi qashan jasalatyny belgili boldy

ALMATY. KAZINFORM — Almatyda kommýnaldyq jelilerdegi esepke alý quraldary kezeń-kezeńimen tsıfrlyq qurylǵylarǵa aýystyrylady.

Qalalyq tsıfrlandyrý basqarma basshysynyń orynbasary Meıram Dúısekovtiń aıtýynsha, bul bastamalar kommýnaldyq ınfraqurylymdy basqarýdyń tıimdiligin arttyryp, resýrstyń joǵalýyn azaıtyp, apattyq jaǵdaılarda jedel áreket etýge jaǵdaı jasaıdy. Al bul derekter megapolıstiń tsıfrlyq egizine engizilip, bir ortalyqqa biriktiriledi. Qazir jobanyń seriktesi retinde Shenchjen qalasyndaǵy jetekshi kompanııa — SUTPC tańdalǵan. Bastama qazaqstandyq «Qala AI» kompanııasymen birlesip, granttyq qarjylandyrý negizinde júzege aspaq.

— «Jas Qanat» shaǵyn aýdany — pılottyq kezeńde tsıfrlyq kóshirmesi jasalatyn aýmaq retinde belgilendi. 2026 jylǵy qańtardan 2027 jylǵy naýryzǵa deıin munda ınjenerlik jelilerdi túgendeý men tolyq tsıfrlandyrý josparlanǵan. Júıeni tolyq ıntegratsııalaý men engizý jaǵy keler jylǵa mejelenip otyr, — dedi ol.

Meıram Dúısekov qalalyq ortany baqylaýdyń ınnovatsııalyq ádisteri de engizile bastaǵanyn atap ótti. Almatyda alǵash ret jer baýyrlap ushatyn ushqyshsyz ushý apparattaryn paıdalaný boıynsha pılottyq joba iske qosylyp jatyr. Jobany Shenzhen Smart City Group pen «Qazaqtelekom» AQ-men birlesip júzege asyrady.

Almaly aýdanynda — Nazarbaev, Abaı, Rozybakıev pen Raıymbek kóshesiniń aralyǵynda kóshe jaryǵy men tazalyq sapasyn baqylaýǵa arnalǵan synaq aımaǵy quryldy.

Sonymen qatar Bókeıhanov pen Rysqulov kóshesiniń aýmaǵynda, sondaı-aq Alataý aýdanyndaǵy «Ójet» shaǵyn aýdanynda ekologııalyq baqylaýǵa arnalǵan synaq aımaqtary uıymdastyryldy.

Eske salaıyq, buǵan deıin Almatynyń tsıfrlyq egizi jobasyn Qytaı agenttigi qarjylandyrýy múmkin ekenin jazǵanbyz.

Almaty qalasynyń tsıfrlyq egizin qurý bastamasy alǵash ret 2022 jyly aıtyldy.