Almatynyń Toraıǵyrov kóshesinde jaıaý serýendeýge arnalǵan aımaq qurylady
ALMATY. KAZINFORM – Bostandyq aýdanynda ornalasqan Toraıǵyrov kóshesinde zamanaýı jaıaý júrginshiler aımaǵy qurylyp jatyr.
Bostandyq aýdanynyń ákimi Sanjar Álın bul aýmaq barlyq jastaǵy turǵynǵa qolaıly ári qaýipsiz qoǵamdyq keńistik bolatynyn atap ótti. Onyń aıtýynsha, Toraıǵyrov kóshesin abattandyrý úshin 2024 jyly «Halyq qatysatyn bıýdjet» baǵdarlamasyna turǵyndary tarapynan ótinim berilgen.
Búgingi kúni aýmaq tolyq tazartylyp, eski qurylymdar buzylǵan. Injenerlik jumystar júrgizilgen, al jańa jol jabyny tóselip jatyr. Odan bólek jobada taktıldi plıtkalarmen jabdyqtalǵan keń trotýarlar, demalys aımaqtary, balalardyń oıyn alańy, jastarǵa arnalǵan vorkaýt alańy, avtomatty sýarý júıesi qarastyrylǵan. Sonymen qatar 1 500-den astam buta men 500-ge jýyq aǵash egiledi jáne «qaýipsiz kóshe» tujyrymdamasy aıasynda jaryqtandyryp, kamera ornatylady.
– Jaıaý júrginshiler aımaǵy 4,2 gektardan astam aýmaqty qamtıdy. Buryn bul aýmaq qala turǵyndaryna jaısyzdaý bolatyn: demalýǵa arnalǵan oryndyqtary, balalar alańy bolǵan joq, trotýarlary tar ári yńǵaısyz, kógal da joqtyń qasy edi, - dedi aýdan ákimi.
Negizgi jumystardy 2025 jyldyń qazan aıynyń sońyna deıin aıaqtaý josparlanǵan.
Eske salaıyq, Almatyda Qarasaı kóshesiniń bir bóligi jańarǵan alleıaǵa aınalatynyn jazǵanbyz.