Almatynyń Tóle bı kóshesinde relster alyndy: LRT qurylysy bastala ma
ALMATY. KAZINFORM – Almatyda kóktem kezinde LRT qurylysyna daıyndyq jumystary bastaldy. Qazir jyldam relsti kólik jobasy qandaı satyda? Kazinform tilshisi anyqtap kórdi.
2026 jyldyń sáýir aıynda LRT jobasyn iske asyrý úshin daıyndyq kezeńi bastalyp, Tóle bı kóshesinde burynǵy tramvaı relsteri bólshektele bastady. Al jınalǵan materıaldar «Almatyelektrkólik» JShS-yna ótkiziletini habarlandy.
Redaktsııa saýalyna jaýap bergen qalalyq jol ınfraqurylymyn damytý basqarmasy qazir Tóle bı kóshesinde tramvaı relsterin demontajdaý jumystary tolyq aıaqtalǵanan atap ótti. Vedomstvo málimetinshe, jalpy uzyndyǵy 16 552 metr rels alynǵan.
- Demontaj jumystary Tóle bı kóshesiniń Momyshuly kóshesinen Áýezov kóshesine deıingi aralyǵynda júrgizildi. Qazirgi tańda tramvaı relsterin alyp tastaý jumystary 100 paıyzǵa aıaqtaldy, - dep habarlady basqarmadan.
Aıta ketken jón, qazir tramvaı relsteri alynǵan Tóle bı kóshesiniń ortasy qorshalǵan jáne onda LRT jobasynyń sýretteri ilingen.
Joba qandaı satyda
Vedomstvo ókilderi jyldam relsti kóliktiń qurylysyna daıyndyq bastalǵanymen, onyń jobalaý-smetalyq qujattamasy endi ázirlenetinin málimdedi. Búginde LRT boıynsha tehnıkalyq-ekonomıkalyq negizdeme memlekttik saraptamadan ótkizilip jatyr.
- Saraptamany aıaqtaýdyń boljamdy merzimi – 2026 jyldyń shilde aıy. "Memsaraptama” qorytyndysy alynǵannan keıin jobalaý-smetalyq qujattamany ázirleıtin jobalaýshy uıym aıqyndalyp, tıisti shart jasalatyn bolady, - delingen basqarma jaýabynda.
Almatylyq LRT qaı baǵytta júredi
Bıyl aqpan aıynda daıyn bolǵan tehnıkalyq-ekonomıkalyq negizdemede jyldam relsti kóliktiń qaı kóshelermen júretini kórsetildi. Qujat málimetteri boıynsha LRT deposy Farıza Ońǵarsynova, Móńke bı jáne Baýyrjan Momyshuly kósheleriniń aralyǵynda ornalasady.
Depodan bastaý alǵan jyldam relsti kólik jelisi Momyshuly kóshesimen ońtústik baǵytta Tóle bı kóshesine deıin, sosyn Tóle bı kóshesimen shyǵys baǵytta Abylaı han dańǵylyna deıin júredi. Osy ýchaskeden marshrýt soltústikke qaraı burylyp, Abylaı han dańǵylymen Almaty-2 temirjol vokzalyna deıin jalǵasady. Sońǵy aıaldama «Raıymbek batyr» — kólik-aýysyp otyrý torabynyń aýmaǵynda qarastyrylǵan. Jobanyń qurylysy 2027 jyldyń ІІ toqsanynda bastalyp, 2029 jyldyń ІІ toqsanynda aıaqtalýy yqtımal.
Buǵan deıin Almaty jol qozǵalysyn uıymdastyrý jáne jolaýshylar kóligi basqarmasynyń basshysy Erjan Dıhanbaev elordada iske qosylǵan LRT-dan almatylyq jobanyń basty aıyrmashylyǵyn atady.
Eske salaıyq, qazirgi ýaqytta LRT qurylysy úshin Jetisý, Almaly, Áýezov jáne Alataý aýdandarynyń aýmaǵynda ornalasqan 270 jer telimin memleket muqtajyna alý jumystary júrgizilip jatyr.
